Ўзбекистон Ҳиндистондан гўшт импортини кенгайтириш ва ушбу мамлакатда гўшт етиштириш ҳамда тайёрлаш бўйича қўшма корхоналар ташкил этишни режалаштирмоқда. Бу ҳақда қишлоқ хўжалиги вазири Иброҳим Абдураҳмонов маълум қилди.

Вазирнинг сўзларига кўра, Ўзбекистон ва Ҳиндистон ўртасида қишлоқ хўжалиги, хусусан, чорвачилик ва озиқ-овқат соҳаларидаги ҳамкорлик кенгайиб бормоқда. Айни пайтда Ҳиндистондан нисбатан арзон гўшт маҳсулотларини импорт қилиш бўйича ишлар олиб борилмоқда.

Абдураҳмонов гўшт импортида маҳсулотнинг ҳалоллиги ва хавфсизлиги асосий талаблардан бири бўлишини таъкидлади. Ҳиндистонда гўштни сўйиш ва тайёрлаш жараёнларида Ўзбекистон мутахассислари иштирок этиши ҳамда тегишли халқаро ва ҳалол сертификатлар таъминланиши бўйича келишувларга эришилган.

«Ўзимизнинг озиқ-овқат корхоналаримиз гўштни ўша жойда тайёрлаб, кейин экспортини йўлга қўйиши режалаштирилмоқда», — деди вазир.

Шунингдек, гўштни Ўзбекистонга етказиб бериш логистикасини ривожлантириш бўйича ҳам ишлар олиб борилмоқда. Хусусан, Туркиянинг Мерсин порти орқали Ҳиндистон, Туркия ва Ўзбекистон ўртасида уч томонлама логистика йўналишини йўлга қўйиш режалаштирилган.