Украинада мудофаани молиялаштириш учун 27 миллиард доллар миқдорида маблағ тақчиллиги юзага келган. Бу ҳақда Украина мудофаа вазири Евгений Хмара 29 август куни журналистлар билан учрашувда маълум қилди.

Вазирнинг сўзларига кўра, Мудофаа вазирлиги молиявий тақчилликни қоплаш бўйича бир нечта вариантни ишлаб чиққан.

Улардан биринчиси — 2027 йил учун мўлжалланган Европа кредити маблағларининг бир қисмини муддатидан олдин жалб қилиш.

Иккинчи йўналиш эса Европанинг Украинани қўллаб-қувватлаш ташаббусига ҳали қўшилмаган давлатларни жалб этиш ёки ушбу ташаббус доирасидаги бадалларини ошириши мумкин бўлган мамлакатлар билан ҳамкорликни кучайтиришдан иборат.

Хмара, шунингдек, мудофаанинг муайян эҳтиёжлари учун қўшимча маблағ ажратиши мумкин бўлган ҳамкор давлатлар аниқланганини билдирди.

«Украина ҳамкорларига аниқ қараш ва режа тақдим этади. Унда Мудофаа кучлари олдида турган вазифалар, амалий лойиҳалар, кутилаётган натижалар ҳамда уларни амалга ошириш муддатлари акс этади», — деди вазир.

Аввалроқ Олий Раданинг миллий хавфсизлик, мудофаа ва разведка масалалари қўмитаси аъзоси Сергей Рахманин Мудофаа вазирлигининг молиявий аҳволи мураккаблашгани ҳақида гапирган эди.

Украинанинг янги бош вазири Сергей Корецкий ҳам ҳукумат ва Молия вазирлиги йил охиригача Мудофаа кучларининг зарур харажатларини тўлиқ қоплаш учун қўшимча маблағ излаётганини маълум қилган.

Украина сиёсатчилари ва ҳарбийлари август ойи бошидан буён қиш оғир кечиши мумкинлигидан огоҳлантирмоқда. Бунга, хусусан, Россия ҳужумларини қайтариш учун ҳаво мудофааси воситалари етишмаслиги сабаб бўлиши мумкинлиги айтилмоқда.