«Ўзбекистон темир йўллари» 2026 йилнинг биринчи ярмида 1 триллион сўм соф фойда олди. Бу 2025 йилнинг мос давридаги 659 миллиард сўмга нисбатан 350 миллиард сўм ёки 53 фоизга кўп.

Компаниянинг молиявий ҳисоботига кўра, январь–июнь ойларида соф тушум 9 триллион 618 миллиард сўмни ташкил этган. Бу ўтган йилнинг шу давридаги 7 триллион 425 миллиард сўмга нисбатан қарийб 30 фоизга кўп.

Тушумнинг ошишига йўловчи ташиш хизматлари нархларининг кўтарилгани ҳам таъсир қилган. Хусусан, 1 февралдан «Шарқ», «Насаф» ва «Ўзбекистон» поездлари, шунингдек, «Афросиёб» электропоездлари чипталари нархи 15 фоизга оширилган.

Фойда тушумдан тезроқ ўсган

Ҳисобот даврида маҳсулот ва хизматлар таннархи 6 триллион 701 миллиард сўмни ташкил этган. Бу ўтган йилга нисбатан 17 фоизга ёки 974 миллиард сўмга кўп.

Шунга қарамай, тушум таннархга нисбатан тезроқ ўсгани ҳисобига ялпи фойда 2 триллион 917 миллиард сўмга етган. Бу бир йил аввалги кўрсаткичга нисбатан 72 фоизга кўп.

Компания давр харажатларини ҳам 18 фоизга қисқартириб, уларни 1 триллион 66 миллиард сўмгача туширган. Натижада асосий фаолиятдан олинган фойда 2 триллион 399 миллиард сўмни ташкил этиб, бир йил ичида икки баробардан кўпроқ ошган.

Айнан асосий фаолиятдан олинган фойданинг кескин ўсиши компаниянинг соф фойдаси ошишида асосий омиллардан бири бўлган.