Тошкентда Иқтисодий Ҳамкорлик ташкилотининг XVI саммити арафасида ИҲТга аъзо мамлакатларнинг бизнес учрашуви бўлиб ўтди. Халқаро иқтисодий шерикликни мустаҳкамлаш йўлидаги яна бир муҳим қадам бўлган бизнес-форум ИҲТга аъзо давлатлар Савдо-саноат палаталари, вазирликлари, тегишли идоралари, банклари ва хусусий компаниялари раҳбарлари ҳамда вакилларини жамлади.

Унинг ишида Озарбайжон, Эрон, Қозоғистон, Қирғизистон, Покистон, Тожикистон, Туркманистон, Туркиядан 300 нафардан ортиқ делегат ҳамда 300 дан ортиқ маҳаллий вакиллар иштирок этдилар, уларда вазият, шунингдек, савдо-иқтисодий ҳамкорликни кенгайтириш ва фаоллаштириш истиқболлари муҳокама қилинмоқда.

Ушбу бизнес-форумдан кўзланган мақсад ИҲТ мамлакатлари билан иқтисодий ҳамкорликни фаоллаштириш, Ўзбекистон тадбиркорлари билан ушбу ташкилотга аъзо давлатлар ўртасида янги алоқаларни ўрнатишдан иборат.

Хорижий ишбилармон доиралар билан бундай кенг кўламли ва кўп форматли ҳамкорлик дунё ҳамжамияти, ишбилармон доиралар ва йирик инвесторларнинг йирик лойиҳаларни амалга ошириш, самарали ҳамкорликни чуқурлаштириш, қитъа чорраҳаси сифатидаги мамлакатимиз улкан салоҳиятини рўёбга чиқаришдан манфаатдор эканидан далолатдир.

Сўнгги йилларда Ўзбекистон ва ИҲТ ўртасида узоқ муддатли истиқболда самарали ҳамкорлик қилиш учун мустаҳкам замин яратиб, ҳамкорликда ишлаш бўйича мустаҳкам тажриба тўпланди. Президентимиз Шавкат Мирзиёев раҳнамолигида мамлакатимиз ҳар томонлама шериклик муносабатларини қарор топтиришга ўз ҳиссасини қўшиш баробарида ИҲТга аъзо давлатлар билан ҳам муносабатларни муваффақиятли ривожлантирмоқда.

Таъкидлаш жоизки, Саммитнинг асосий мақсадлари – Ўзбекистон ҳудудлари ва тармоқлари салоҳиятини намойиш этиш, Ўзбекистонда янги инвестиция лойиҳаларини амалга оширишга ИҲТга аъзо мамлакатлар компанияларини жалб қилиш, Ўзбекистон Савдо-саноат палатаси ва Палата ўртасидаги институционал алоқаларни мустаҳкамлашдан иборат.

• ИҲТ
• Иқтисодиёт
• Тошкент
• саммит