“Мен ишимни ёмон кўраман”. Шу сўзларни кимгадир айтганингизда, улар сизга “дарахт бир жойда кўкаради” деган нақлни айтган, тўғрими? Бироқ сиз дарахт эмассиз, унутманг. Агар ростдан ҳам ҳозирги ишингиздан кўнглингиз тўлмаса, сизда учта вариант бўлади. Улардан бири – ўзингиз қилаётган ишингиздан завқланмасангиз ҳам, у ерда ишлашда давом этасиз, иккинчиси – вазиятни яхшилашга ҳаракат қиласиз, учинчиси – бу ишни ташлаб, ҳаётнинг кейинги босқичига ўтасиз. 

Бироқ ҳар доим вазиятни яхшилаш имконияти мавжуд. Сиз ёмон кўрган ишни қандай тарк этишни ўйлашдан олдин, келинг, ўз ишингизни қандай севиш кераклигини кўриб чиқайлик.

“Ишимни ёмон кўраман” каби фикрларни тинч қўйинг

Ишингиздан нафратланишни давом эттириш вариант эмас. Нега? Янги иш топиш осон эмас ва ишончли бизнес даромадини яратиш вақт талаб қилиши мумкин. “Мен ўз ишимни мутлақо ёмон кўраман” деган фикрдан “ҳозирча ишим жойида” ёки ҳаттоки “менга шу кунларда ишим жуда ёқади” деган фикрга ўтишнинг кўплаб усуллари мавжуд. Яъни, вазиятни яхшилаш учун ҳаракат қилинг ва ҳиссий ҳолатингизни яхшилаш учун нуқтаи назарингизни ўзгартиринг.

Иш ҳақиқатан ҳам муаммо эканлигини аниқланг

Ишни “Мен ишимни ёмон кўраман” деб ўйлашга мажбур қиладиган нарсалар рўйхатини тузишдан бошланг. Нафратга нима сабаб бўлаётганини аниқлашга ҳаракат қилинг. Бу ёмон хўжайинми? Ҳаддан ташқари рақобатбардош ҳамкасбларми? Сиз бажара олмайдиган ёки яхши бажара олмайдиган янги ва қўшимча масъулиятми? Иш юки бирдан ортдими ёки камайдими? Бу сизга муаммони ҳал қилишга кўмак беради. Бундан ташқари, агар сиз иш қидиришни бошлашга қарор қилсангиз, кейинги ишингизда нимани хоҳламаслигингизни аниқлашга ёрдам беради.

Мақсадларни белгиланг

Энди нима учун ишингиздан нафратланаётганингизни аниқлаганингиздан сўнг, вазиятни яхшилаш йўлларини ишлаб чиқишга ҳаракат қилинг. Кичик ғалабаларни қидиринг. Агар сиз ниманидир яхшиласангиз, бу катта ўзгаришларга олиб келиши мумкин.

Нима учун бу ишни қабул қилганингизни ўзингизга эслатинг

Ишингиздан қанчалик нафратлансангиз ҳам, иш топишдан умидвор бўлган миллионлаб ишсизлар ҳақида ўйлаб кўринг. Сизнинг ишингиз мукаммалликдан узоқ бўлса-да, бу ҳали ҳам иш. Бу сизга маош тўлайди ва жамиятга ҳисса қўшиш имкониятини яратади.

Баъзан бу ишни бошлаганингизда эга бўлган мотивацияни бир эслаб кўринг. Эҳтимол, яхшигина маош, ишингиз уйга яқин ёки шахсий ривожланиш учун фойдаси катта. Ижобий фикрлашни яратишдан ташқари, сиз учун нима муҳимлигини тушуниш кейинги қадамларингизни оқилона танлашга ёрдам беради. “Миннатдорчилик ҳаётнинг тўлиқлигини очади”, – деб ёзади ёзувчи Мелоди Битти. – “Бу бизда мавжуд бўлган нарсаларни етарлича ва яна кўп нарсаларга айлантиради. Бу рад этишни қабул қилишга, тартибсизликни аниқликка, овқатни зиёфатга, бегона одамни дўстга айлантиради”.

Нима қилишни яхши кўришингизни аниқланг

Муаллиф ва мотивацион маърузачи Саймон Синек шундай дейди: “Бизга ёқмайдиган нарса учун қаттиқ ишлаш стресс деб, биз севган нарса учун қаттиқ ишлаш эса эҳтирос деб аталади”.

Ҳаётингизга фойда келтирмайдиган ва вақтингизни беҳуда сарфлайдиган машғулотлардан воз кечинг. Тежаган вақтингиздан ўзингизга ёқадиган ишни бажариш учун фойдаланинг. “Мен ишимни ёмон кўраман” дейиш осон, лекин ўз қулайлигингиз учун ҳаракат талаб қилинади. Нима бўлишидан қатъий назар, нима қилишни яхши кўришингизни билсангиз, буни кундалик ишингизга киритишингиз мумкин.

Ёрдам сўранг

Стрессли, ғазабланган, ҳаддан ташқари сиқилган ёки ишда ҳақоратланганда ёрдам сўраш уят эмас. Америка Қўшма Штатларининг 44-президенти Барак Обама, “Сизга керак бўлганда ёрдам сўрашдан қўрқманг. Мен буни ҳар куни қиламан. Ёрдам сўраш заифлик белгиси эмас, бу куч белгисидир”, деган экан. Вазиятингизни яхшилаш йўлларини аниқлаш учун ишончли ҳамкасбингиз, менежерингиз ёки оила аъзоларингиз билан маслаҳатлашинг.

Алоқани ривожлантиришга ҳаракат қилинг

Ишингиздан мақсад топишда қийналяпсизми? Агар маъносиз бўлиб туюлса, ўзингизни ишга боғлаш йўлларини топиб, ишингизда маъно яратинг. Ҳамкасбларингиз билан дўстлашинг. Бошқалар билан алоқа ўрнатиш сизга ўз ишингизда тиришқоқроқ бўлишга ёрдам беради. Одамлар бир-бирига боғланган бўлса, ҳаёт янада тўлиқроқ бўлади. Ҳамкасбларингиз билан алоқани мустаҳкамлаш йўлларини қидиринг, шунда ишингиз шунчаки даромад манбаи бўлмайди.

Раҳбарингиз билан “очиқ бўлинг”!

Хўжайинингиз билан ишингизни ёмон кўришингиз сабабларини муҳокама қилиш қийин бўлиши мумкин, аммо буни бажариш лозим. Агар сиз ҳар куни бир хил вазифаларни бажариш монотонлигидан зериксангиз, хўжайинингизга боринг ва улар сизга беришга тайёр бўладиган янги масъулият бор-йўқлигини сўранг. Эҳтимол, улар сизни қизиқтирган соҳадаги лойиҳада ёрдам излаётгандир. Агар сўрамасангиз, билмайсиз! Шу билан бир қаторда, компанияда бошқа лавозимлар пайдо бўлса, хўжайинингиздан сизга хабар беришини сўрашингиз мумкин. Вақт ўтиши билан ўзингиз ёқтирган соҳага ўтиш имкониятига дуч келишингиз мумкин.

Ишингизга завқ бағишланг

Сиз завод линиясида ёки офисда маълумотларни киритиш ходими сифатида ишлашингиз мумкин. Сиртдан бу ишлар зерикарли кўринар, балки. Бироқ агар завқланиш умиди билан ишга борсангиз, натижалар сизни ҳайратда қолдиради. Иш кунингизга завқ бағишлаш усуллари орасида хушчақчақ ҳамкасблар билан танаффуслар ўтказиш, ишда қўшиқ айтиш, ҳамкасблар билан ҳазил қилиш киради. Профессионал бўлиш – ҳар доим жиддий бўлиш кераклигини англатмаслигини тушунишдир.

Иш жойингизни қулайлаштиринг

Энг яхши нарсалардан бири бу – шахсий иш муҳитингизни назорат қилишдир. Мисол учун, агар офисда ишласангиз, столингиз ва тортмаларингиз тоза ва тартибли эканлигига ишонч ҳосил қилинг. Кейин иш столингизга безакли ўсимлик ёки яқинларингизнинг суратини қўйиш орқали ҳам қандайдир ишчанлик муҳитини ошириш мумкин.

Дам олинг

Дам олиш Кариб денгизига қиммат саёҳат бўлиши шарт эмас. Ҳаётингиз ҳақида фикр юритиш ва келажагингизга эътибор қаратиш учун ҳар қандай таътил вақтидан фойдаланинг. Бу иш қидириш ва интервьюларга бориш ёки вақтингизни қимматли маслаҳатлар берадиган дўстларингиз ва оила даврасида ўтказиш учун ишдан бўш вақт бўлиши ҳам мумкин. Вақтингиз бўлиши билан сиз ҳақиқатан ҳам ишингиздан кетишни хоҳлайсизми ва агар шундай бўлса, кейинги қадамларингиз қандай бўлиши ҳақида ўйлашингиз керак.

Хулоса шуки, қарорингиз қандай бўлишидан қатъий назар, вазиятингизни яхшиланг. Бу қўшимча ақлий юкни яратишга арзимайди. Сиз юқоридаги тавсиялардан бирини танлашингиз мумкин, бу ҳеч нарса қилмаслик ва йилдан йилга тушкунликка тушишдан кўра яхшироқдир. Ишингиздан нафратланиш сизни янги ва муваффақиятли ҳаётга ундаш учун керак бўлган омил бўлиши мумкин. Ҳозир ҳаракат қилинг!

Шуни ёдда тутингки, сиз ҳақиқатан ҳам катта ўзгаришларга ва мақсадларга эришишга қодирсиз. Ўртамиёналикка рози бўлишни тўхтатинг ва ўз орзуингиз билан яшашни бошланг! Ўзингиз истамаган ҳаётга рози бўлишингиз шарт эмас. Ўзингиз хоҳлаган ҳаётга интилинг.

• Фойдали
• Karyera
• қизиқарли