ДХХ Тошкент вилояти бўйича бошқармаси томонидан Сирдарё ва Жиззах вилоятларида гиёҳвандлик воситаларининг ноқонуний айланмасига қарши тезкор тадбирлар ўтказилди.

Тадбирлар давомида Тошкент шаҳрида яшовчи, 1985-йилда туғилган ва муқаддам судланган фуқаронинг Сирдарё туманидаги вақтинчалик яшаш хонадони текширилган. Унда 1983-йилда туғилган Тожикистон фуқароси ҳамда Қашқадарё вилоятида яшовчи, 1962-йилда туғилган, аввал гиёҳвандлик воситалари савдоси билан боғлиқ жиноят учун судланган яна бир шахс борлиги аниқланган.

Суриштирувлар натижасида учала шахс қўшни Тожикистондаги наркокурерлар томонидан Жиззах вилоятининг Янгиобод тумани ҳудудидаги яширин жойга қолдирилган наркотик моддаларни олиб, уларни сотиш ва тарқатиш орқали ноқонуний даромад олишни режалаштиргани аниқланган.

Тезкор тадбир давомида яширин жойдан 13 килограмм 653 грамм опий моддаси топилиб, протсессуал тартибда ҳужжатлаштириб олинган.

Мазкур ҳолат юзасидан шахсларга нисбатан жиноят иши қўзғатилган. Ҳозирда тергов ҳаракатлари олиб борилмоқда.