Лондон университети (“MRC Unit for Lifelong Health and Aging”) мутахассислари томонидан олиб борилган кўп йиллик тадқиқотга кўра, ҳатто кичик миқдордаги жисмоний фаоллик деменцияни (хотира, фикрлаш, хулқ-атвор ва кундалик ишларни бажариш қобилиятининг пасайиши) ривожланиш хавфини камайтиради.

Таъкидланишича, бунинг учун бутун умр спорт билан шуғулланиш шарт эмас.

Кексаликда жисмоний фаоллик мия фаолиятини яхшилаши узоқ вақтдан бери исботланган. Бироқ катта ёшдаги инсонларда когнитив функцияларга ижобий таъсир кўрсатиши учун машғулотларни қанча ва қайси ёшда бошлаш кераклиги ҳали фанга номаълум эди. Энди бу саволга жавоб бор.

“Neurology, Neurosurgery & Psychiatry” (“Неврология, Нейрохирургия & Психиатрия”) журналида чоп этилган тадқиқотда муаллифлар 30 йил давомида 1500 га яқин одамнинг жисмоний фаоллигини кузатиб, 69 ёшида уларнинг когнитив ҳолати, оғзаки хотираси ва қайта ишлаш тезлигини синаб кўрди. Энг яхши кўрсаткич спорт билан шуғулланганларга тегишли бўлган.

Аммо 50-60 ёшдан бошлаб машғулотларни бошлаган иштирокчилар ҳам умуман спорт билан шуғулланмаган “пенсионер”ларга қараганда 70 ёшида яхши натижа кўрсатиши кутилмаган ҳолат эди. Шу билан бирга, спорт залига кўп вақт сарфлашнинг ҳожати йўқлиги маълум бўлди. Ҳатто ойига битта машқ қилиш кифоя. Аммо ҳаёт давомида жисмоний фаолликни сақлаб қолиш энг яхши вариант, деб хулоса қилишади олимлар.

Бошқача қилиб айтганда, машқ қилишни бошлаш учун ҳеч қачон кеч эмас. Бу ҳар қандай ёшдаги инсон саломатлиги учун киритилган сармоядир.

• Касаллик
• Mashg'ulot
• ўртача умр кўриш ёши