Канадада ёш бола хавфсизлик камарини тақишдан бош тортгани сабабли йўловчи самолётининг парвози бекор қилинди. Ҳодиса оқибатида барча йўловчилар кейинги кунги рейсга қайта жойлаштирилди.

Воқеа 6 август куни Porter Airlines авиакомпаниясининг Виктория шаҳридан Торонто томон учиши керак бўлган самолётида содир бўлган. Парвозга тайёргарлик вақтида бола ўз ўрнида тик турган ва хавфсизлик камарини тақишдан бош тортган.

Боланинг ота-онаси ва экипаж аъзолари уни камар тақишга кўндиришга ҳаракат қилган, бироқ уринишлар самара бермаган. Шундан сўнг экипаж самолётни терминалга қайтариб, бола ва унинг ота-онасини бортдан туширган.

Авиакомпания бундай шароитда самолётнинг хавфсиз парвоз қилиши мумкин эмаслигини билдирган. Парвознинг кечикиши сабабли самолёт ярим тунда учиш-қўниш йўлаги ёпилгунга қадар ҳавога кўтарила олмаган. Натижада йўловчилар кейинги кунги рейсга ўтказилган.

Мутахассисларнинг таъкидлашича, хавфсизлик камарини тақмаган бола кучли турбулентлик вақтида жиддий жароҳат олиши ёки бошқа йўловчиларга урилиши мумкин.

Йўловчилардан бири Арие Козучнинг айтишича, бола безовталик қилмаган, аксинча, қўрқиб кетгандек кўринган. Унинг сўзларига кўра, бола ўриндиқ остига яширинган ва уни камар билан боғлашга уринишганда яна ўриндиқ остига кириб кетган.

Воқеа ижтимоий тармоқларда турли мунозараларга сабаб бўлди. Айримлар ота-оналар фарзандининг хатти-ҳаракатини қатъийроқ назорат қилиши кераклигини айтган бўлса, бошқалар болалар самолётдан қўрқиши ёки хавфсизлик камарини тақишга қийналиши мумкинлигини таъкидлаган.