“Маха.дхб” тахаллуси билан Қозоғистонда фаолият юритган ўзбекистонлик блогер Маҳмуд Ҳикматов ноқонуний интернет-казиноларни тарғиб қилишда айбланиб, халқаро қидирувга берилди. Бу ҳақда Қозоғистон Молиявий мониторинг агентлиги маълум қилди.

Қозоғистон суди 2000 йилда Ўзбекистонда туғилган Маҳмуд Ҳикматовга нисбатан қамоққа олиш тарзидаги эҳтиёт чорасини танлаган.

Тергов маълумотларига кўра, Қозоғистон ҳудудида 5 дан ортиқ ноқонуний онлайн қиморхоналар фаолиятини таъминлаш, пул маблағларини қабул қилиш ва тўлаш, шунингдек, фуқароларни қимор ўйинларига жалб қилиш учун реклама тарқатилган.

Қайд этилишича, ноқонуний қимор ўйинларини тарғиб қилиш учун ташкилотчилар Ҳикматовни жалб қилган. Унга Қозоғистонда фаолият юритувчи инфлюенсерларни топиш ва улар орқали реклама контентларини жойлаштиришни ташкил этиш вазифаси юклатилган.

Агентлик маълумотига кўра, Ҳикматов 35 нафардан ортиқ блогерни ҳамкорликка жалб қилган. Улар орасида блогер Ҳамза Қ. ҳам бўлган.

Ҳамза Қ. интернет-казиноларга реферал ҳаволалар жойлаштириб, фойдаланувчиларни тақиқланган қимор фаолиятига жалб қилган ва ҳар бир ҳавола орқали ўтган фойдаланувчи учун мукофот олган.

Маълум қилинишича, Ҳамза Қ. жорий йилнинг 6 август куни Ветнамдан Қозоғистонга экстрадиция қилинган.

Ҳозирда Маҳмуд Ҳикматовга нисбатан тергов ҳаракатлари давом этмоқда.