Полшанинг Ломжа шаҳрида уч нафар қўшни 5-қаватдаги балкондан йиқилган 4 ёшли қизни ёпинчиқ ёрдамида тутиб қолиб, унинг ҳаётини сақлаб қолди.

Воқеа 9 август куни тушдан кейин содир бўлган. Қўшнилар бинонинг 5-қаватидаги балкон четида осилиб турган қизни кўриб қолган. Қутқарув хизматлари етиб келгунига қадар уч нафар эркак қиз тушиши мумкин бўлган жойга ёпинчиқни ёйиб, уни йиқилган вақтида тутиб қолган.

Воқеа кузатув камераларига ҳам тушган. Полиция маълумотларига кўра, қўшниларнинг тезкор ҳаракати туфайли фожианинг олди олинган.

Қиз шифохонага олиб борилган. Шифокорлар унинг танасида енгил кўкаришлар аниқланганини, ҳозирда аҳволи барқарор эканини билдирган.

Дастлабки маълумотларга кўра, воқеа вақтида қизнинг онаси ухлаётган бўлган, отаси эса чет элда ишлаётган бўлган. Кейинчалик онанинг қонида 0,7 промилле миқдорида алкоголь аниқланган.

Ҳозирда ҳолат юзасидан тергов давом этмоқда. Агар она фарзандини ўлим ёки оғир жароҳат олиш хавфи остида қолдиришда айбдор деб топилса, унга 5 йилгача қамоқ жазоси тайинланиши мумкин.