АҚШнинг собиқ президенти Жо Байденда аниқланган простата саратони танасининг бошқа қисмларига, жумладан суякларига ҳам тарқалган. Касаллик унга кучли оғриқ ва ҳолсизлик келтирмоқда. Бу ҳақда унинг ўғли Хантер Байден BBC телеканалига берган интервьюсида маълум қилди.

Хантер Байден отасининг соғлиғи ҳақида гапирар экан, унинг аҳволини кузатиш оила учун жуда оғир кечаётганини таъкидлади. Унинг сўзларига кўра, саратон метастазлари суяклар ва бошқа аъзоларга ҳам тарқалган.

83 ёшли Жо Байден АҚШ тарихидаги энг кекса президент ҳисобланади. Унинг ёши президентлик даврида соғлиғи билан боғлиқ хавотирларни кучайтирган. Байден 2025 йил май ойида, Оқ уйни тарк этганидан тўрт ой ўтмай, саратон касаллигига чалинганини маълум қилган эди.

Хантер Байденнинг айтишича, отасининг касаллиги бутун оила учун оғир синов бўлган. Шунга қарамай, Жо Байден жамоатчилик олдида ўзи муҳим деб ҳисоблаган масалалар юзасидан фикр билдиришда давом этмоқда.

Интервью давомида Хантер Байден отаси томонидан унга берилган афв ҳақида ҳам гапирди. У ушбу қарор учун отасидан миннатдор эканини айтиб, шу билан бирга, афв қарорини танқид қилиш учун асослар борлигини ҳам тан олди.

Эслатиб ўтамиз, Жо Байден 2025 йилда саратон ҳужайраларини олиб ташлаш мақсадида жарроҳлик амалиётини бошдан кечирган эди.