Футбол бўйича Аргентина миллий терма жамоаси сардори Лионел Месси Қатар-2022 финалида Франция устидан қозонилган тарихий ғалабада иштирок этган Аргентина терма жамоаси ва ёрдамчи ходимларининг ҳар бир аъзоси учун 35 та олтин iPhone буюртма қилди. Бу ҳақда “Тhe Sun” нашри хабар берди.

Маълум қилинишича, қиймати 175 000 фунт стерлингга баҳоланган 24 каратли тилла билан қопланган смартфонларда футболчиларнинг исмлари, рақамлари ва Аргентина терма жамоаси логотипи ўйиб ёзилган.

Манбанинг таъкидлашича, Месси ушбу лаҳзани нишонлаш учун ўзгача ва ранг-баранг иш қилмоқчи бўлган. У тадбиркор Бен Лёнс билан боғланган ва улар биргаликда дизайнни ишлаб чиқишган.

“У ажойиб ғалабани нишонлаш учун барча ўйинчилар ва ходимларга алоҳида совға беришни исташини, бироқ одатдагидек соат совға қилишни истамаслигини айтди. Мен футболчиларнинг номлари кўрсатилган тилла iPhone'ларни таклиф қилдим ва унга бу ғоя ёқди”, – дейди Бен Лёнс.

Аргентина ЖЧ-2022 финалида Францияни мағлуб этди. Месси учун бу унинг фаолиятидаги бешинчи жаҳон чемпионати бўлди. Аммо бу сафар у илк бор чемпион бўлишга эришди.

• Аргентина
• Месси
• iPhone