Беларусь раҳбари Александр Лукашенко Москвадаги ғалаба паради маросимида соғлиғининг ёмонлашгани ҳақидаги миш-мишларга изоҳ бериб, уларни ақлга сиғдириб бўлмайдиган аҳмоқлик, деб атади. Бу ҳақда БелТА нашри маълум қилди.

Қайд этиш мумкин, сиёсатчи жорий йил 9 май куни Россия пойтахтига ташриф буюрган, бироқ Қизил майдондаги параддан ташқари барча расмий тадбирларда иштирок этмаган.

Кейинчалик унинг сафар вақтида қўлига боғич тақилган ҳолатдаги суратлари тарқалди ва юрак xуружига учраган ёки аденовирусга чалинган бўлиши мумкинлиги тахмин қилинди. Ўшанда Беларусь раҳбари ҳатто Минск шаҳрига белгиланган муддатдан илгари қайтиб кетгани айтилган эди.

“Мени Москва Марказий шифохонасига олиб боришгани ҳақидаги ва шу билан боғлиқ хабарлар ақлга сиғдириб бўлмайдиган аҳмоқликдир. Яна бир нарса – бу Марказий шифохона қаердалигини ҳам билмайман. Агар менга ёрдам керак бўлса, бир неча соат ичида Путин ўша шифохонадан ўнлаб шифокорларни чақиртирган бўларди”, – дейди Лукашенко.

Лукашенко хасталангани ҳақидаги хабарлардан сўнг биринчи марта 15 май куни омма олдига чиқди. Ўша вақтда ҳам унинг чап қўлида махсус боғич бор экани маълум бўлган эди.

• Беларусь
• Лукашенко
• Путин
• Россия
• саломатлик