26 январь куни бўлиб ўтган сайловларда Беларуснинг амалдаги раҳбари Александр Лукашенко еттинчи президентлик муддатига қайта сайланди.

Хабар берилишича, унга сайловчиларнинг 86,82 фоизи овоз берган. Шунингдек, сайловчиларнинг 3,6 фоизи барча номзодларга қарши овоз берган. Давомад 85,7 фоизни ташкил этган. Либерал-демократик партия етакчиси Олег Гайдукевич 2,02 фоиз овоз олган. Тадбиркор Анна Канопатская 1,86 фоизни қўлга киритган. Коммунистик партия Марказий қўмитасининг биринчи котиби Сергей Сиранков 3,21 фоиз, Меҳнат ва адолат партияси раиси Александр Хижняк эса 1,74 фоиз овоз тўплаган.

Овоз беришдан кейин бўлиб ўтган матбуот анжуманида Лукашенко ҳокимиятни топшириш учун ўзига ворис қидирмаётганини айтди. У республиканинг келажакдаги раҳбарияти аллақачон мавжуд кадрлар захирасидан шакллантирилганини таъкидлаган.

Беларусдаги сайловлар ғарблик кузатувчилар иштирокисиз, шунингдек, хорижда сайлов участкалари очилмаган ҳолда бўлиб ўтди. Европа иттифоқи Беларусда бўлиб ўтган президентлик сайловларини эркин ва демократик деб ҳисобламасликларини, шунинг учун Минскка қарши санкциялар жорий этишни давом эттириш ниятини билдирди.

• Беларусь
• Лукашенко