NDTV телеканали маълумотига кўра, Ҳиндистон ғарбидаги Ражастан штатида Джайсалмер – Джодхпур трассаси бўйлаб ҳаракатланаётган йўловчи автобусида содир бўлган ёнғин оқибатида камида 20 киши ҳалок бўлди, 10 дан ортиқ киши жароҳатланди.

Маълумотларга кўра, ичида 57 киши бўлган автобус ҳаракатланаётганда тўсатдан ёниб кетган. Гувоҳларнинг айтишича, дастлаб автомобиль орқасидан тутун пайдо бўлган. Ҳайдовчи йўл четига тўхташига қарамасдан, аланга бир неча дақиқа ичида бутун автобусни қамраб олган.

Йўловчилар турли даражадаги куйиш жароҳатлари билан шифохоналарга етказилган. Йигирма кишининг ўлгани тасдиқланган ва улардан баъзиларининг шахсини аниқлаш учун ДНК текшируви ўтказилиши керак бўлади.

Дастлабки маълумотларга кўра, ёнғинга қисқа туташув сабаб бўлган.

• Автобус
• Ҳиндистон
• ёнғин