Франция ва Италия ўртасида Европа қўшинларини Украинага юбориш масаласи юзасидан дипломатик можаролар юзага келди.

АФПънинг хабар беришича, яқинда Италия бош вазири ўринбосари Маттео Салвини, Буюк Британия ва Франция бошчилигидаги “Хоҳловчилар коалицияси” муҳокама қилаётган тинчликпарвар контингент доирасида Италия қўшинларини Украинага юбориш масаласига кескин муносабат билдирди.

“Франция президенти Эммануэл Макроннинг ўзи дубулға кийсин ва қўлига милтиқ олиб Украинага бораверсин”, — деган у.

АФПънинг дипломатик манбаларга таяниб ёзишича, бу баёнотдан сўнг Италиянинг Париждаги элчиси Эмануэла ДЪАлессандро Франция Ташқи ишлар вазирлигига чақирилган.

Италия элчисига Салвинининг сўзлари “икки мамлакат ўртасидаги ишонч муҳити ва тарихий муносабатларга зид” экани билдирилган.

“Бу Салвини томонидан Макронга қарши айтилган илк кескин фикр эмас. Март ойида Салвини Франция президентини “телба” деб атаб, уни Европани Россия билан урушга ундаётганликда айблаган эди”, – дея ёзмоқда AFP.

• Fransiya
• Италия
• Макрон