Мактаб битирувчилари “Бўлажак ёш муҳандислар” фан олимпиадасида иштирок этиб, Damas ютиб олишлари мумкин. Бу ҳақда мактабгача ва мактаб таълими вазири Ҳилола Умарова маълум қилди.

Унинг билдиришича, апрель ойида Тошкент тўқимачилик ва енгил саноат институти томонидан “Бўлажак ёш муҳандислар” фан олимпиадаси ўтказилади. Ушбу олимпиадада фақат 11-синф ўқувчилари иштирок этиши ва ўқувчилар физика, математика ҳамда кимё фанларидан билимини синаб кўриши мумкин.

Ғолиблар қуйидагича тақдирланади:

1-ўрин — Damas автомобили (3 дона);

2-ўрин — 20 миллион сўм (3 нафар ўқувчига);

3-ўрин — 10 миллион сўм (3 нафар ўқувчига).

“Айтиш мумкинки, бу каби лойиҳалар ҳам ўқувчиларимизнинг ўз устида янада ишлаши ва билимга қизиқишини оширади”, – дейди мактабгача ва мактаб таълими вазири.

Президент фармони билан 2025 йилдан “Эл-юрт умиди” жамғармасининг янги стипендия йўналиши сифатида “Ёрқин истеъдод” лойиҳаси жорий этилади.  Жамғармага жорий йилда “Ёрқин истеъдод” лойиҳаси учун 300 миллиард сўм ажратилади. Шунингдек, нуфузли халқаро фан олимпиадалари ғолиб ва совриндорларига тўланадиган бир марталик пул мукофотининг амалдаги миқдорлари 5 бараварга оширилади.

• Автомобил
• Мукофот
• Олимпиада
• Oliy ta'lim, fan va innovatsiyalar vazirligi