Футбол бўйича 2026-йилги жаҳон чемпионати бошланиши арафасида Мексикада минглаб ўқитувчилар норозилик намойишларини бошлади. Юзага келган вазият муносабати билан мамлакат президенти Клаудия Шейнбаум махсус баёнот билан чиқди.Маълум қилинишича, Мехико шаҳри марказидаги Сокало майдонида ўтказилиши режалаштирилган ФИФА мухлислари фестивали норозилик акциялари сабаб бошқа ҳудудга кўчирилиши мумкин. Тадбир жаҳон чемпионатининг очилиш маросими ва илк учрашуви муносабати билан ташкил этилган бўлиб, унда президентнинг ҳам иштирок этиши кутилган эди.

Бироқ Клаудия Шейнбаум Мексика ва Жанубий Африка терма жамоалари ўртасидаги очилиш учрашувига бормаслигини маълум қилди. Унинг айтишича, вазиятни яқиндан кузатиш ва норозилик намойишлари билан боғлиқ ҳолатни назорат қилиш устувор вазифа ҳисобланади.Намойишларда иштирок этаётган ўқитувчилар давлат пенсия тизимини қайта кўриб чиқиш, таълим соҳаси ходимлари учун амалдаги қонунчиликни ўзгартириш ҳамда иш ҳақларини оширишни талаб қилмоқда.

Улар ҳукумат талабларни бажармагунча акцияларни давом эттиришини билдирган.Ҳукумат маълумотларига кўра, намойишчилар Сокало майдонида лагерь ташкил қилиши ва фестиваль ўтказилиши режалаштирилган ҳудудни эгаллаб олиши мумкин. Шунингдек, бир гуруҳ фаоллар Астека стадиони яқинидаги асосий автомобиль йўлларидан бирини ҳам тўсиб қўйган.Расмийлар жаҳон чемпионати очилиш ҳафтаси давомида ҳам норозилик акциялари давом этишини тасдиқлаган.

Агар тадбир Сокало майдонида ўтказилмаса, Мехико шаҳри бўйлаб олдиндан тайёрланган 18 та муқобил майдондан фойдаланиш режалаштирилган. Маълумот учун, футбол бўйича ЖЧ–2026 бугун — 11 июнь куни расман старт олади. Турнирнинг илк учрашувида мезбонлардан бири бўлган Мексика терма жамоаси Жанубий Африка билан майдонга тушиши режалаштирилган.