Блогер ва телебошловчи Виктория Боня Ўзбекистонга ташриф буюриб, пахта даласидан туриб мамлакат Президенти Шавкат Мирзиёевга миннатдорлик билдирди. Бу ҳақда у 25 июнь куни ўзининг Instagram саҳифасида эълон қилинган видеомурожаатида маълум қилди. «Мен Ўзбекистон Президенти Шавкат Миромоновичга миннатдорлик билдирмоқчиман. Ҳозир мен Ўзбекистонда, пахта далаларида турибман. Бу ерга маълум бир миссия билан келдим. Бу ерда бўлган бир неча кун давомида нафақат миллий маданият сақлаб қолинаётганини, балки ерларнинг салоҳияти ҳам кенгайтирилаётганини кўрдим.

Табиатни қадрлайдиган инсон сифатида бу мен учун жуда муҳим. Мен кўплаб мамлакатларда бўлганман ва кўряпманки, айрим давлатлар тезкор ишлаб чиқариш, арзон ва синтетик маҳсулотларга ўтмоқда. Бу эса, афсуски, экологияга салбий таъсир кўрсатмоқда», — деди Боня. Шунингдек, блогер Ўзбекистон халқига эзгу тилакларини ҳам билдирди. «Ўзбекистон қандай ривожланаётганини ўз кўзларим билан кўрганимдан жуда хурсандман. Сизга, халқингизга ва ерларингизга яна узоқ йиллар давомида тараққиёт ва фаровонлик тилайман.

Мен бу ерда нафақат меҳмондўст ва самимий инсонларни, балки обод ва яхши парваришланган ҳудудларни ҳам кўрдим. Бундай меҳнатни қадрламаслик мумкин эмас. Халқингизга ривожланиш ва ўсиш учун яратилаётган имкониятлар учун сизга чин қалбимдан раҳмат айтаман», — деди Виктория Боня.