Украина - НАТО кенгаши йиғилишидан сўнг Шимолий Атлантика альянси давлатлари Киевга иқтисодий, гуманитар ва ҳарбий ёрдам кўрсатишда давом этишини, жумладан, Украина ҳаво мудофаасини кучайтиришни маълум қилди. Бу ҳақда кенгаш баёнотида айтилади.

Таъкидланишича, НАТОнинг кўплаб аъзолари 2024 йилда Киевга “миллиардлаб евролик қўшимча имкониятлар” тақдим этиш режаларини эълон қилган. Айнан нима ҳақида гап кетаётгани баёнотда очиқланмаган.

Шунингдек, НАТО аъзолари Россиянинг Украинага берган зарбаларини, Россиянинг Шимолий Кореядан баллистик ракеталар ва Эрондан учувчисиз учоқлар олиб, уларни урушда қўллашини “қатъий қоралаган”.

Украина - НАТО Кенгашининг йиғилиши 10 январь куни элчилар даражасида бўлиб ўтди, йиғилиш Россия қўшинлари томонидан Украина ҳудудларининг тобора кўпроқ ўққа тутилиши фонида Киев илтимосига биноан чақирилди.

Ички сиёсий келишмовчиликлар туфайли АҚШ Конгресси Украинага кейинги ҳарбий ёрдам учун 60 миллиард доллардан ортиқ маблағ ажратилишини ҳали тасдиқлагани йўқ. 2023 йил охирида АҚШпрезиденти Жо Байден маъмурияти Украинани қўллаб-қувватлаш учун ажратилган маблағ деярли тугаб бўлганини таъкидлаганди.

“Euractive” нашрига кўра, Европа Иттифоқи Киевга 2024 йил мартидан кечиктирмай маблағ ажратишга ваъда берган. Газета манбаларига кўра, Европа расмийлари Венгрия вето қўйган 50 миллиард евролик ёрдам пакети бўйича келишиб олишга ҳамон умид қилмоқда.

“Politico" нашрининг хабар беришича, Венгрия Украинага тўрт йил давомида ёрдам кўрсатишни маъқуллашга тайёр, бироқ бу ёрдам ҳар йили кўриб чиқилиши керак

• Моддий ёрдам
• НАТО
• Украина