Ўзбекистоннинг олтин-валюта захиралари бир ойда қарийб 5 миллиард долларга яқин қийматда ошди. Бу ҳақда Марказий банк эълон қилган статистик рақамларда кўрсатилган.

2025 йил 1 октябрь ҳолатига кўра, Ўзбекистон олтин-валюта захираларининг 44,2 млрд долларлик қисми олтин ҳиссасига тўғри келади, қолган қисми эса хорижий валюта ва қимматли қоғозларда сақланади.

Таққослаш учун, 2024 йилнинг шу даврида захиралар қиймати 41,1 млрд доллар бўлган, яъни бир йил ичида улар 13,9 млрд долларга ошган. Бу ўсишнинг катта қисми – 12,4 млрд доллар – олтин нархининг кескин кўтарилиши ҳисобига юз берган.

Шу билан бирга, олтин захирасининг қиймати ошган бўлса-да, ҳажми бироз камайган. 1 октябрь ҳолатига кўра, захираларда 11,6 млн унция (409,1 минг тонна) олтин мавжуд. Августда бу кўрсаткич 11,8 млн унция, сентябрь бошида эса 12,3 млн унция бўлган.

Статистика қўмитаси маълумотларига кўра, 2025 йил январь-август ойларида Ўзбекистон 22,98 млрд долларлик товар ва хизмат экспорт қилган, шундан 8,42 млрд доллари (36,7 фоиз) олтин экспорти ҳиссасига тўғри келган — бу мамлакат тарихидаги энг юқори кўрсаткич ҳисобланади.

• Марказий банк
• Олтин
• Ўзбекистон