Ўзбекистонда банк тизими орқали амалга ошириладиган йирик пул ўтказмалар устидан назорат кучайтирилмоқда. Адлия вазирлиги 8 май куни Марказий банк ҳамда Бош прокуратура ҳузуридаги Иқтисодий жиноятларга қарши курашиш департаментининг тегишли қарорини рўйхатдан ўтказди.

Янги тартиб FATF — жиноий даромадларни легаллаштиришга қарши халқаро тавсиялар асосида ишлаб чиқилган бўлиб, йирик молиявий операциялар устидан мониторингни кучайтиришни назарда тутади.

Янги тартибга кўра:

• 175 миллион сўмдан юқори операциялар банклар томонидан чуқур текширувдан ўтказилади
• Банк ҳисобисиз амалга ошириладиган операциялар учун назорат чегараси 206 млн сўмдан 175 млн сўмга туширилди
• 10,3 млн сўм ва ундан юқори ички пул ўтказмаларида қўшимча маълумотлар талаб қилинади (манзил, туғилган сана, СТИР)

Шунингдек, 16 ёшгача бўлган шахслар ҳисобварағида 16,48 млн сўмдан ортиқ маблағ ҳаракати икки иш куни ичида шубҳали операция сифатида баҳоланиши мумкин.

FATF “кучайтирилган мониторинг” рўйхатидаги давлатлар билан боғлиқ йирик транзакциялар ҳам шубҳали операция сифатида кўриб чиқилади.

Банклар шубҳали операция аниқланган тақдирда 10 иш куни ичида текширув ўтказади ва маблағ манбаини таҳлил қилади.

Янги тартиб 9 августдан кучга киради.