Ҳукуматнинг тегишли қарорига кўра, умумий ўрта таълим муассасаларида фаолият юритаётган ва халқаро аккредитацияланган тизимда олий малака тоифасига эга ўқитувчилар эндиликда педагогика йўналиши бўйича магистратурада масофавий таълим шаклида мақсадли асосда таҳсил олиши мумкин бўлади.

Мазкур тартиб асосида қабул амалдаги магистратура қабул қоидалари асосида амалга оширилади. Ўқитувчилар ишдан ажралмаган ҳолда масофавий шаклда ўқийди ҳамда магистратурани тамомлагандан сўнг камида уч йил умумий ўрта таълим муассасаларида фаолият юритиши шарт бўлади.

Қарорга кўра, мақсадли магистратурага қабул қилинган олий тоифали ўқитувчиларга тўлов-контракт суммасини давлат бюджети ҳисобидан қоплаш бўйича амалдаги имтиёзлар татбиқ этилмайди.

2026/2027-ўқув йилидан бошлаб ушбу тизим Низомий номидаги Ўзбекистон миллий педагогика университетида йўлга қўйилади.

Шунингдек, янги ўқув йилидан давлат ва нодавлат мактабгача таълим ташкилотларида фаолият юритаётган ўрта махсус маълумотли педагоглар учун бакалавриат босқичида дуал таълим шакли ҳам жорий этилади.