Иқтисодий тараққиёт ва камбағалликни қисқартириш вазирлиги тухум маҳсулотини мамлакатдан олиб чиқиб кетишга тақиқ қўйди.

Вазирлик мазкур тартибни вақтинчалик эканини, шунингдек, ички бозорда нархлар барқарорлигини таъминлаш учун амалиётга жорий қилинганини айтмоқда.

Вазирликка кўра, йилнинг қиш мавсумида ушбу маҳсулот нархига қўшимча босим юзага кела бошлайди. Масалан, 2021 йилнинг сентябрь-декабрь ойларида республика бўйича тухум нархи 19,6 фоизга, айрим ҳудудларда эса 20-22 фоизгача қимматлашган.

“Тухум нархининг ошишига қиш ойларида иситиш харажатлари ошиши ва паррандачилик хўжаликларида касалликларнинг авж олиши, тухум беришга мослашган товуқларнинг мавсумий янгиланиши, озуқа маҳсулотларининг қимматлашиши ҳамда куз мавсумидан бошлаб ушбу маҳсулотга талабнинг ортиб бориши (бошқа ойларга нисбатан 20-30 фоизга ошади) таъсир кўрсатди”, – дейилади вазирлик изоҳида.

Вазирлик, шу билан бирга, иқтисодиётда тўлиқ бозор механизмларини жорий қилиш, тадбиркорлик субъектлари учун чекловларни кескин камайтириш бўйича амалга оширилаётган ислоҳотларни тўлиқ қўллаб-қувватлашини маълум қилган.

Аксарият иқтисодчилар эса ҳукуматнинг тухум экспортига қўйган тақиқи яширин ҳужжатлар билан амалга оширилганини танқид остига олиб, экспортга бўлган чекловлар тухум ишлаб чиқаришни кескин қисқартиришига сабаб бўлишини айтмоқда.

• Экспорт
• Иқтисодиёт
• Тухум
• Вазирлик