Тарихда илк бор ярадор аскар дрон орқали эвакуация қилинди.

У ярим йил давомида эвакуация қилинишини кутган – оғир жароҳатлари туфайли ўз оёқларини кесиб ташлашига тўғри келган.

Украина қуролли кучлари тарихда илк бор дрон ёрдамида фронт чизиғидаги ярадор ҳарбий хизматчисининг муваффақиятли эвакуатсиясини амалга оширди. Reuters агентлиги 49 ёшли Константин Власенконинг қутқарилиши тарихини унинг тилидан ҳикоя қилди.

Константин Власенко 2025-йил май ойида Харкив области Купянск йўналишида хизмат қилган. У ва Баски лақабли шериги фронт чизиғидаги хандақда позицияни ушлаб туришган. Уларга озиқ-овқат ва ўқ-дори дрон орқали етказиб берилган. Уларга бошқа йўл билан таъминот етказишнинг имкони йўқ эди – душманнинг беҳисоб дронлари туфайли фронт чизиғидаги ҳар қандай ҳаракатланиш ўлимга олиб келиши мумкин эди, дея қайд этади Реутерс.

2025-йил кузида уларни ротация қилиш вақти келади, аммо уларнинг ўрнини эгаллаш учун йўл олган икки жангчи позицияга етиб бормасдан дронлар зарбасига учрайди. Шундан кейин жасадларни олиб келиш учун жўнатилган яна икки жангчи ҳам ҳалок бўлади. Власенконинг ҳикоя қилишича, ўшанда у «бу ердан тирик чиқиб бўлмайди» дея ўйлай бошлаган.

Феврал ойи ўрталарида, окопда ўтган 10 ойдан кейин Власенко ва Баски позициясини ташлаб чиқишига тўғри келади, чунки окопни сув босади ва улар вайрон бўлган мактаб биносига кўчиб киришади. Аммо дрон орқали ташланган егулик ва кийимларни олиш учун ташқарига чиқишганида, уларни Россия разведка дрони пайқаб қолади. Шундан кейин бу ерга бошқа бир дрон учиб келиб, позитсияга зарба беради, ўша куни 50 ёшини нишонлаши керак бўлган Баски дарҳол ҳалок бўлади.

Власенконинг чап оёғининг кафт қисми мажақланиб кетади, ўнг оёғи эса синиб, тескари бўлиб қолганди. У ўзи учун пана жой топиб, у ергача судралиб боришга муваффақ бўлади – бу мактабни иситиш учун мўлжалланган металл котёл остидаги тахминан 80 га 60 сантиметр ўлчамдаги чуқурча эди.

Видеони очиш

Власенконинг ҳикоя қилишича, унинг чап оёғи аста-секин «чирий бошлайди», ўнг оёғининг болдир қисмида эса суяги ташқарига чиқиб қолганди – ва у иккала оёғини ҳам кесиб ташлашга қарор қилади. «Мен уларни ампутация қилишга мажбур бўлдим, чунки барибир шунчаки судралиб юрардим. Суяк борган сари бўртиб чиқаётганди», – деган у.

Власенко «умидини йўқота бошлаганида», унинг командирлари эвакуация йўлини излай бошлайди, дея ёзади Reuters. Душман дронлари туфайли уни зирҳли техникада олиб кетиб бўлмасди, шунинг учун, аввалига уни қуруқликда ҳаракатланувчи роботлаштирилган платформа орқали эвакуация қилмоқчи бўлишади – аммо Россия дронлари бундай қурилмалардан иккитасини Власенконинг олдига етиб бормасидан йўқ қилади.

Шундан кейин қўмондонлик 90 килограммгача юк кўтарувчи ва бу юк билан 25 километр масофани босиб ўтувчи янги оғир дронни синаб кўришга қарор қилади. Бу параметрлар эвакуация учун мос келади: зобитларга кўра, Власенко фронт чизиғида ўтган бир йил ичида вазн йўқотган ва унинг вазни 70 килограммга тушганди, у турган жойдан хавфсиз фронт орти ҳудудигача масофа эса 15 километр чиқарди.

Эвакуатсия октабр ойи бошида амалга оширилган. Бир кун олдин Власенкога посилка орқали керакли анжомлар ва қандай ҳаракат қилиш кераклиги ўргатилган видеоролик сақланган телефон етказилган.

Эвакуатсия вақтида дрон Власенко билан 70 метр баландликка кўтарилган. Унинг атрофида Россия дронларини чалғитиб туриши керак бўлган яна учта кичик дрон ҳамроҳлик қилган. Яна тўртта ФПВ-дрондан иборат бўлинма, самолёт типидаги дронлар ҳамда артиллерия кучлари эса эвакуатсиядан олдин ва эвакуатсия вақтида яқин атрофдаги Россия дрон операторлари позициялари бўйлаб тинимсиз зарбалар берган.

Парвоз 15 дақиқа давом этган. «Мен ўрмоннинг қаеригадир йиқилишдан қўрқмадим, аммо сувга йиқилишдан қўрқдим, чунки суза олмасдим», – дея ҳикоя қилади Власенко. Ҳозирда у Харкивдаги шифохонада реабилитация жараёнини ўтамоқда.