“Мамлакатимизнинг элчихонаси кўмагида Покистонда мушкул аҳволда қолган ҳамюртимиз К.И. ва унинг 5 нафар фарзанди Ўзбекистонга қайтарилди”, – деб хабар қилмоқда “Дунё” ахборот агентлиги.

Ўзбекистон дипломатик ваколатхонаси маълумотига кўра, К.И. ўз мурожаатида Покистонда боқувчисиз қолгани, турар жой ва кундалик эҳтиёжлар, хусусан озиқ-овқат учун ҳам зарур маблаққа эга эмаслигини маълум қилиб, Ўзбекистонга қайтиши учун амалий ёрдам сўраган.

Мурожаат элчихона томонидан алоҳида назоратга олиниб, тезкор чоралар кўрилиб, улар вақтинчалик турар жой, озиқ-овқат, кийим-кечак ҳамда кундалик эҳтиёжлари учун маблағ билан таъминланган. Шунингдек, оиланинг Ўзбекистонга етиб олиши учун ватанга қайтиш гувоҳномалари расмийлаштирилган ҳолда барча турдаги зарур консуллик-ҳуқуқий ёрдам кўрсатилган.

Покистоннинг тегишли вазирлик ва идоралари мутасаддилари билан ўтказилган музокаралар натижасида, ушбу мамлакатдаги виза тартиботи ва бу ерда бўлиб туриш тартиблари бузилганига қарамасдан, К.И.  ва унинг фарзандларини жарима ва тўловларсиз давлатдан чиқариб юбориш тўғрисида келишувга эришилган.

Ўзбекистон элчихона ва Миграция агентлиги кўмагида ушбу оилага “Узбекистан Airways” авиакомпаниясининг “Исломобод-Тошкент” йўналишидаги самолётига авиачипталар олиб берилиб, улар 27 сентябрь куни Ўзбекистонга кузатиб қўйилган.

• Konsullik
• Моддий ёрдам
• Ўзбекистон
• Покистон