31°
Кечаси 18°
Украина президенти Володимир Зеленский Нью-Йоркда бўлиб ўтаётган БМТ Бош Ассамблеясида нутқ сўзлади. Унинг таъкидлашича, Россия ядро қуролига эгалик қилиш ҳуқуқига эга эмас.
“Украина учинчи йирик ядро арсеналидан воз кечди. Кейин дунё Россия бундай кучнинг қўриқчиси бўлиши керак деган қарорга келди. Аммо кейинги тарих шуни кўрсатдики, ўша пайтда, 1990 йилларда ядровий қуролсизланишга айнан Россия энг муносиб бўлган. Россия ҳозир ҳам қуролсизланишга лойиқ. Террорчилар ядро қуролига эгалик қилиш ҳуқуқига эга эмас”, – деди Украина президенти.
Зеленскийнинг сўзларига кўра, Россия қурол сифатида нафақат Украинага, балки бошқа давлатларга ҳам қўлланилаётган бошқа кўплаб воситалардан фойдаланади. Мисол тариқасида, у кўплаб мамлакатларга таъсир қиладиган озиқ-овқат таъминотини келтирди.
Зеленский ўз нутқида украиналик болаларнинг Россияга олиб кетилишини ҳам геноцид деб атади.
“Болаларни уйга олиб келишга ҳаракат қиляпмиз, аммо вақт тугаяпти. Улар билан кейин нима бўлади? Уларга нима бўлади? Россиядаги бу болалар Украинадан нафратланишга ўргатилади. Уларнинг оилалари билан барча алоқалар узилади. Бу шубҳасиз геноциддир!”, – деди Украина президенти.
Шунингдек, у “ҳар ўн йилда Россия янги уруш бошлаётгани, Молдова ва Грузиянинг бир қисми ишғол остида қолаётгани ва Россия Сурияни харобага айлантирганини” таъкидлади. Унинг сўзларига кўра, "Россия деярли Беларусни “ютиб юборди” ва Қозоғистон ва Болтиқбўйи мамлакатларига таҳдид солмоқда".
“Украинага қарши олиб борилаётган жорий урушдан мақсад еримизни, халқимизни, ҳаётимизни, ресурсларимизни сизга қарши, қоидаларга асосланган халқаро тартибга қарши қуролга айлантиришдир”, деди Зеленский.
Зеленский нутқи якунида “парда ортида қандайдир хира битимлар тузиш”га уринишлардан хабардор эканини айтди.
“Ёмонликка ишониб бўлмайди. Пригожиндан сўранг, Путиннинг ваъдалари ишонишга арзийдими? Илтимос, мени эшитинг. Ҳаммаси очиқ ҳал қилинсин”, – деди Украина президенти.
Нью-Йоркдаги нутқидан сўнг, Зеленский Вашингтонга боради ва у ерда АҚШ президенти Жо Байден, Конгресс палаталари ва партиялари етакчилари, ҳарбий раҳбарият ва америкалик бизнес вакиллари билан музокаралар ўтказиши режалаштирилган.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
