Россиянинг Одинсово шаҳрида ўтказилган рейдларда 15 нафар Ўзбекистон фуқароси қўлга олинган. Бу ҳақда Ўзбекистоннинг Россиядаги элчихонаси маълум қилди.

Қайд этилишича, ижтимоий тармоқларда Россия ички ишлар вазирлигининг Одинсово шаҳри округидаги 5-полиция бўлимида 4 кундан ортиқ вақт давомида 15 нафар Ўзбекистон фуқароси ноқонуний ушлаб турилгани ҳақида хабарлар тарқалган.

Вазиятга аниқлик киритиш мақсадида 8 августда элчихонанинг консуллик бўлими ходимлари окрукдаги бўлимда бўлган. Учрашув давомида ўзбекистонликлар мамлакат ички ишлар бошқармаси ходимлари томонидан Одинсово шаҳар округида ўтказилган рейд натижасида ҳибсга олингани аниқланган.

Юқорида қайд этилган Ўзбекистон фуқаролари Москва вилояти ҳудудида тегишли рухсатномаларни расмийлаштирмасдан меҳнат фаолиятини ноқонуний равишда олиб борган.

9 август куни улар Россиядан чиқариб юбориш учун ИИВнинг Москва вилояти бош бошқармаси чет эл фуқароларини вақтинча сақлаш марказига жойлаштирилган.

Ўзбекистоннинг Россиядаги элчихонаси ушбу давлатга келишни режалаштираётганлардан, шунингдек, меҳнат миграцияси бўйича шу ердаги фуқаролардан мамлакатда белгиланган қонун ҳужжатларига риоя қилишларини сўради.

• Elchixona
• Россия