Руанданинг Рубаву тумани, Ғарбий провинцияда 2023 йил, 3 май куни юзага келган табиий офатлар оқибатида аҳоли хонадонлари сув остида қолган.

Руанда ҳукумати матбуот котиби ўринбосари Ален Мукураринданинг айтишича, соат 15:30 га келиб қурбонлар сони 129 кишига етган.

“Энди бизнинг асосий вазифамиз ҳар бир жабрланган фуқаронинг уйга етиб бориш ва уларни қутқариш, турли кўнгилсизликлардан муҳофаза қилиш”, – деди Руанданинг Ғарбий вилояти губернатори Франсуа Ҳабитегеко.

Ҳабитекёнинг айтишича, табиий офат оқибатида Себея дарёси қирғоқларидан тошиб кетган.

Президент Пол Кагаме ўз баёнотида унинг ҳукумати жабрланганларга, жумладан, вақтинча кўчириш ишларига ёрдам бераётганини маълум қилган.

Бундан ташқари, тошқинлар қўшни Уганданинг Руанда билан чегарадош тоғли ҳудуди, жануби-ғарбий Кисоро туманида ҳам бир кечада олти кишининг умрига зомин бўлган.

Қайд этилишича, мазкур икки мамлакатда март ойининг охиридан бери кучли ва узоқ давом этувчи ёмғир ёғмоқда.

Уганданинг Рвензори тоғлари яқинидаги Касесе каби бошқа тоғли ҳудудларида ҳам кўчкилар кузатилган, бу ерда юз берган турли тошқинлар уйларни вайрон қилган. Оқибатда юзлаб одамлар ўз хонадонларини тарк этишга мажбур бўлган.

• Руанда
• Табиий офат
• Уганда
• сув_тошқини