Президент Шавкат Мирзиёев 30 июнь куни ёшлар билан учрашувда Ўзбекистон миллий терма жамоасининг футбол бўйича Жаҳон чемпионатидаги иштирокига тўхталиб, футболчиларни қўллаб-қувватлашга чақирди. “Миллий жамоамизнинг АҚШ ва Мексика майдонларидаги ўйинларини бутун халқимиз билан бир тан-у бир жон бўлиб, катта ҳаяжон билан кузатиб бордик. Футболчиларимиз ФИФА рейтингида 5-ўринда турган Португалия, 13-ўриндаги Колумбия ҳамда таркибида Европанинг етакчи клубларида тўп сураётган футболчилар жамланган Конго ДР терма жамоаларига қарши ўйинларда катта тажриба орттирди, мундиал муҳитини ҳис қилди. Аббос Файзуллаев ва Элдор Шомуродовнинг Жаҳон чемпионатидаги илк голлари эса халқимизга қувонч улашди”, — деди давлат раҳбари.

Президент миллий терма жамоанинг мундиалдаги иштироки юзасидан турли фикрлар билдирилаётганини қайд этар экан, футболчилардан айб қидирмаслик кераклигини таъкидлади. “Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос эмас. Аксинча, бугун уларни қўллаб-қувватлаш, руҳиятини кўтариш ҳар қачонгидан ҳам муҳим”, — деди Шавкат Мирзиёев.

Давлат раҳбари катта ғалабалар ҳали олдинда эканини таъкидлаб, бунинг учун футболни ривожлантириш, соҳага инвестицияларни кўпайтириш ҳамда, энг аввало, болалар футболига эътиборни янада кучайтириш зарурлигини қайд этди. Шунингдек, келаси йил январь ойида Саудия Арабистонида бўлиб ўтадиган Осиё кубогига тайёргарлик ҳозирданоқ бошланиши маълум қилинди. “Биз жамоамизга ишонамиз ва ушбу мусобақада ҳам бутун халқимиз билан уни қўллаб-қувватлаймиз”, — деди президент.

Эслатиб ўтамиз, Ўзбекистон миллий терма жамоаси италиялик мутахассис Фабио Каннаваро бошчилигида ўз тарихида илк бор Жаҳон чемпионатида иштирок этди. Жамоа гуруҳ босқичида Колумбияга 1:3, Португалияга 0:5 ва Конго ДРга 1:3 ҳисобида мағлуб бўлиб, мусобақани гуруҳ босқичидаёқ якунлади.