АҚШ федерал суди Адлия вазирлигига Жеффри Эпштейн ишига оид айрим ҳужжатларнинг таҳрир қилинмаган, яъни яширин қисмлари олиб ташланган нусхаларини тақдим этишни буюрди. Бу ҳақда АБC Неwс хабар берди. Маълум қилинишича, суд қарорига кўра, Адлия вазирлиги 2 июлга қадар мазкур ҳужжатларни ошкор қилиши ёки нима сабабдан уларни тўлиқ эълон қилиш мумкин эмаслигини тушунтириши лозим. Суд аввал ҳам жамоатчиликка тақдим этилган, аммо маълумотларнинг катта қисми қора чизиқлар билан беркитилган ҳужжатларни қайта кўриб чиқишни талаб қилмоқда. Хусусан, айрим электрон хатларнинг жўнатувчилари ва қабул қилувчилари, шунингдек, айблов ҳужжатларида тилга олинган айрим шахсларнинг исмлари ошкор қилиниши мумкин.

Ошкор қилиниши кутилаётган материаллар орасида АҚШ президенти Доналд Трампни жинсий зўравонликда айблаган аёлнинг сўроқ баённомалари ҳам мавжуд. Адлия вазирлиги мазкур иш юзасидан айрим ҳисоботларни эълон қилган бўлса-да, баённомаларнинг тўлиқ матни ҳозиргача очиқланмаган. Трамп эса унга нисбатан илгари сурилган айбловларни рад этиб келмоқда. Шунингдек, ҳужжатлар орасида вояга етмаган қизларни жинсий эксплуататсия қилиш билан боғлиқ электрон хатлар ҳам мавжуд. Уларда 14–15 ёшли қизлар ҳақида сўз боргани айтилмоқда. Хатлардан бирида Эпштейнга юборилган хабарда қизлардан бири Владимир Набоковнинг машҳур «Лолита» асари қаҳрамонига қиёсланган. Бироқ ушбу хат муаллифининг шахси ҳозирча ошкор қилинмаган.

Бошқа электрон хатларда эса Эпштейннинг айрим шахслар билан шахсий мулоқотлари акс этган. Уларда турли мазмундаги ёзишмалар мавжуд бўлиб, айримлари жамоатчилик эътиборини тортмоқда. Адлия вазирлиги аввалроқ ушбу ҳужжатларда федерал ҳукумат томонидан текширилмаган ва тасдиқланмаган маълумотлар ҳам мавжудлигини билдирган. Хусусан, Трампга нисбатан билдирилган айрим айбловлар «асоссиз ва ёлғон» экани таъкидланган.