Бугун Жанубий Кореянинг Пусан шаҳридаги Кимхе ҳарбий авиабазасида Хитой Халқ Республикаси Раиси Си Цзиньпин ва АҚШ Президенти Доналд Трампнинг учрашуви бўлиб ўтди. Бу ҳақда Хитой марказий телевидениеси хабар берди.

Трамп Цзиньпинни кутиб олиб, Пекин ва Вашингтон кўплаб масалаларда келишувга эришгани ҳамда бу йўналишда саммит давомида ҳам иш олиб борилишини таъкидлаган. Қўшма Штатлар раҳбари, шунингдек, Хитой билан савдо битими айнан шу учрашув якунида имзоланиши мумкинлигини истисно қилмаган. У ҳар доим Си Цзиньпин билан яхши муносабатларда бўлганини қайд этган. 

“Раис Си – буюк давлатнинг буюк етакчиси. Ишонаманки, биз узоқ йиллар давомида ажойиб муносабатларга эга бўламиз”, – дея қўшимча қилган Доналд Трамп. 

Си Цзиньпин ҳам Хитой ва АҚШ бир-бирига ёрдам бериб, муваффақият ва фаровонликка эришиши мумкинлигини айтган.

Шунингдек, Хитой Раиси мамлакатининг ривожланиши ва тикланиши Трампнинг “Американи яна буюк давлатга айлантириш” мақсадига зид эмаслигини таъкидлаган. 

“Мен Президент Трамп билан ҳамкорликни давом эттиришга тайёрман, бу икки давлат ўртасидаги муносабатлар учун мустаҳкам пойдевор ва мамлакатлар ривожи учун қулай шароитлар яратади”, – деган Си Цзиньпин. 

Маълумот учун, икки давлат етакчиси Осиё-Тинч океани иқтисодий ҳамкорлиги (APEC) саммитида иштирок этмоқда. APEC 1989 йилда ташкил этилган бўлиб, 21 та мамлакат иқтисодиётини бирлаштиради. У халқаро ташкилот мақомига эга бўлмаса-да, минтақада савдо ҳамкорлигини ривожлантириш учун муҳим майдон ҳисобланади. 2025 йилда саммитга раислик қилиш ҳуқуқи Жанубий Кореяга ўтган.

• Janubiy Koreya
• Музокара
• Si Szinpin
• Трамп
• uchrashuv