Бош прокуратура ҳузуридаги Департаментнинг Қибрай тумани бўлими ва бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда фуқаро Ш.Ш. “Зафаробод” МФЙ ҳудудидаги хонадонда умумий баҳоси 7 млрд сўмлик сифати кафолатланмаган ва яроқлилик муддати ўтган дори воситалари ҳамда тиббий буюмларни сотиш мақсадида сақлаб келаётгани аниқланган.

Департаментнинг Қўқон шаҳри бўлими ва бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда фуқаро М.А. (муқаддам судланган) “Маҳмуд Таробий” кўчасидаги хонадонида сифати кафолатланмаган умумий баҳоси 289,2 млн сўмлик 46 турдаги 18 473 қути дори воситалари ва тиббий буюмларни сотиш мақсадида сақлаб келаётгани аниқланиб, ушбу дори воситалари ва тиббий буюмлар ашёвий далил сифатида олинган.

Департаментнинг Учтепа тумани бўлими ва бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда фуқаро Ж.А. бошқарувидаги BYD русумли автотранспорт воситаси кўздан кечирилганда, унинг салонида 4 турдаги 26 қути дори воситалари борлиги аниқланган. Тадбир давомида Ж.А.нинг хонадонидан чет элда ишлаб чиқарилган сифати кафолатланмаган 85 турдаги 5 452 дона дори воситалари ва 24 қути кучли таъсир қилувчи дори воситалари ашёвий далил сифатида олинган.

Департаментнинг Қашқадарё вилояти бошқармаси томонидан ўтказилган тезкор тадбирда фуқаро Д.А. “Қарлуқбоғот” МФЙ ҳудудидаги хонадони ертўласида умумий баҳоси 262,5 млн сўмлик 154 турдаги 4 613 дона сифати кафолатланмаган дори воситалари ва тиббий буюмларни келгусида сотиш мақсадида сақлаб келаётгани аниқланиб, ушбу маҳсулотлар ашёвий далил сифатида олинган.

Шунингдек, Қўқон шаҳрида ўтказилган яна бир тезкор тадбирда фуқаро О.Ш. фуқаро М.Б.нинг хонадонида сифатини тасдиқловчи ҳужжатлари бўлмаган умумий баҳоси 257,6 млн сўмлик 26 турдаги 1 925 қути дори воситаларини сотиш мақсадида сақлаб келаётгани аниқланиб, ушбу дори воситалари ашёвий далил сифатида олинган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.