ОТМларга кириш тестлари якунланди: энди йўналиш танлаш бошланади

Давлат олий таълим ва касбий таълим муассасаларига ўқишга кириш учун ўтказилган 2026 йилги тест синовлари 23 июль куни тўлиқ якунланди. Бу ҳақда Билим ва малакаларни баҳолаш агентлиги маълум қилди.

Маълум қилинишича, тест синовларининг сўнгги — 10-кунида республика бўйича 45 минг нафардан ортиқ абитуриент иштирок этган. Ушбу кунда тест синовлари тартиб-қоидаларини бузиш ҳолатлари қайд этилмаган.

10 кун давом этган имтиҳонларда иштирок этиши белгиланган 664 минг 609 нафар абитуриентдан 610 минг нафардан ортиғи қатнашган. Тест жараёнида қоидаларни бузган 70 нафардан ортиқ абитуриент эса синовдан четлаштирилган.

Агентлик маълумотига кўра, 24 июль куни тест синовларининг 10-куни натижалари эълон қилингач, абитуриентлар 25 июлдан 8 августга қадар (шу куни ҳам) иккинчи босқичда йўналиш ва олий таълим муассасаларини танлаш имкониятига эга бўлади.