Германиянинг Вайзенхаус курортида шахмат бўйича нуфузли Freestyle Chess Жаҳон чемпионатининг сўнгги кун беллашувлари ўтказилди. Мусобақада Ўзбекистон шарафини ҳимоя қилган Нодирбек Абдусатторов 3-ўринни эгаллади, Жавоҳир Синдоров эса 7-ўрин учун баҳсда Левон Аронянга мағлуб бўлди.

Ярим финалда Магнус Карлсенга имкониятни бой берган Нодирбек Абдусатторов 3-ўрин учун германиялик Винсент Кеймерга қарши баҳс олиб борди ва 2,5:1,5 ҳисобида ғалаба қозониб, турнирни 3-ўринда якунлади ва 40 000 АҚШ доллари миқдоридаги мукофот пулини қўлга киритди.

Чемпионлик учун ҳал қилувчи баҳсда Магнус Карлсен ва Фабиано Каруана ўзаро тўқнаш келди ва унда дунёнинг биринчи рақамли шахматчиси 2,5:0,5 ҳисобида ғалабага эришди. Карлсен шу тариқа фаолиятида 21-марта турли йўналишлардаги Жаҳон чемпионлигини қўлга киритди.

Яна бир ўзбекистонлик гроссмейстер Жавоҳир Синдоров 7-ўрин учун баҳсда америкалик Левон Аронянга қарши баҳсда мағлубиятга учради. Шу тариқа Синдоров эса турнирни 8-ўринда якунлаб, 10 000 АҚШ доллари миқдоридаги пул мукофотига эга бўлди.

Умумий мукофот жамғармаси 300 минг АҚШ доллари бўлган ушбу мусобақа FIDE Freestyle (Фишер шахмати) йўналиши бўйича илк расмий Жаҳон чемпионатини ҳисобланиб, унда жами 8 нафар шахматчи иштирок этди.

Мусобақада чемпион норвегиялик Магнус Карлсен 100 минг АҚШ доллари миқдоридаги мукофотга эга бўлди.

• Жаҳон чемпионати
• Nodirbek Abdusattorov
• Шахмат