Эртага, 18 февраль кунидан бошлаб республика бўйлаб 2000 дан ортиқ масжидда таровиҳ намозлари ўқилади. Бу ҳақда ИИВ Жамоат хавфсизлиги департаменти хабар берди.

Маълум қилинишича, таровиҳ намозлари соат 20:30 дан кейин бошланади. Уларда ҳар куни тахминан 1 миллионга яқин фуқаро иштирок этиши мумкин.

Ушбу даврда хавфсизликни таъминлаш учун 20 мингга яқин Ички ишлар органлари, Миллий гвардия ҳамда Фавқулодда вазиятлар вазирлиги ходимлари ва ҳарбий хизматчилар жалб этилади. Масжидлар атрофи видеокузатув камералари билан жиҳозланган бўлиб, улар ИИВ Жамоат хавфсизлиги департаментининг мониторинг ва мувофиқлаштириш марказига уланган.

Шу билан бирга, йўлларда хавфсизликни таъминлаш мақсадида 2500 га яқин Йўл патруль хизмати ходими хизмат олиб боради. Айрим масжидлар жойлашган кўчаларда транспорт ҳаракати вақтинча чекланади, кириш жойларига махсус тўсиқлар ўрнатилиб, 150 метр узоқликда алоҳида автотураргоҳлар ташкил этилади. Фавқулодда ҳолатлар учун 200 дан ортиқ махсус техника жалб этилади.

Шунингдек, “Муборак Рамазон ойини муносиб тарзда ўтказиш тўғрисида”ги Президент қарори қабул қилинди.

2026 йилда муборак Рамазон ойининг бошланиши 19 февраль кунига тўғри келиши ҳақида Ўзбекистон мусулмонлари идораси томонидан ахборот берилди.

Қарорга кўра, “Рамазон – меҳр-мурувват, аҳиллик ва шукроналик ойи” деган эзгу ғоя асосида қуйидагиларга алоҳида эътибор берилади:

– кам таъминланган, эҳтиёжманд, ижтимоий ҳимояга муҳтож инсонларни ҳар томонлама қўллаб-қувватлаш;

– маҳаллаларни ўзаро ҳурмат, ҳамжиҳатлик, адолат ва тарбия масканига айлантириш;

– ер, сув, ҳаво ва табиий асраш, муқаддас қадамжолар, зиёратгоҳ ва қабристонларни обод этиш; 

– Рамазон ойи билан боғлиқ тадбирларни исрофгарчиликка йўл қўймасдан, ихчам, мазмунли ва тежамкорлик асосида ўтказиш.

• Президент
• Қарор
• Ramazon