Рақобатни ривожлантириш ва истеъмолчилар ҳуқуқларини ҳимоя қилиш қўмитаси умумий овқатланиш корхоналарини Рамазон ойида мижозларни “сетлар” (комплекс овқатлар тўплами) харид қилишга мажбурламасликка чақирди.

Қўмита маълум қилишича, айрим кафе, ресторан ва ошхоналарда Рамазон даврида “акция сетлар” жорий қилиниб, уларни мажбурий тарзда таклиф қилиш, шунингдек, минимал нарх белгилаб, бошқа танловни чеклаш ҳолатлари кузатилмоқда. Бу эса истеъмолчиларнинг эркин танлов ҳуқуқларини чеклаш аломатларини кўрсатади.

“Истеъмолчиларнинг ҳуқуқларини ҳимоя қилиш тўғрисида”ги қонуннинг 4-моддасига мувофиқ, истеъмолчи товар ва хизматларни эркин танлаш ҳамда уларнинг сифатли бўлишини талаб қилиш ҳуқуқига эга. 21-моддага кўра эса сотувчи ёки ижрочи истеъмолчини қўшимча товарлар харид қилишга ёки хизматлардан фойдаланишга мажбурлай олмайди.

Қўмита умумий овқатланиш корхоналари хизмат кўрсатиш жараёнида мижозларни қўшимча маҳсулот ва хизматларни олишга қистамаслиги, “сет”дан бош тортган тақдирда таомномадаги бошқа таомларни буюртма қилиш ҳуқуқини чекламаслиги лозимлигини таъкидлади.

Шунингдек, истеъмолчилар соғлиғига салбий таъсир кўрсатиши мумкин бўлган, жумладан аллергия чақирувчи таркибий қисмлар инобатга олинмасдан, таомларни овқатлар тўплами таркибида мажбурий сотиш ҳолатларига йўл қўймаслик кераклиги эслатилди.

Рақобат қўмитаси бу каби ҳолатлар истеъмолчилар ҳуқуқларини бузиши мумкинлигини таъкидлаб, қонун талаблари бузилган тақдирда белгиланган тартибда таъсир чоралари кўрилишини эслатди.

• Ogohlantirish
• Қўмита
• Ramazon
• korxona va tashkilotlar
• raqobat