Сурия ҳукумати Сувайда шаҳрига микроавтобуслар жўнатди, бу эса 1500 га яқин бадавийнинг дарзийлар билан тўқнашувлар фонида шаҳарни тарк этишига имкон беради. Дастлабки тинч аҳоли қўшни Дара вилоятига эвакуация қилинган.

Суриянинг SANA давлат агентлиги хабар беришича, Сурия ҳукумати Сувайда шаҳри вакиллари билан келишилган ҳолда, 1500 га яқин бадавийлар кетиши учун у ерга пикап ва микроавтобуслар етказмоқда.

Германиянинг dpa агентлиги маълумотларига кўра, жами 1500 га яқин одам эвакуация қилиниши режалаштирилган. Улардан 350 нафари қўшни Дара вилоятига етказилган.

Сурия ўтиш даври ҳукумати Ички ишлар вазирлиги раҳбари Аҳмад ал-Далатий ҳалокатли тўқнашувлар фонида Сувайдани тарк этишга мажбур бўлган тинч аҳолининг шаҳарга қайтишига рухсат беришни режалаштираётганини айтди. “Биз янги жангларнинг олдини олиш ва ҳудудда муроса ва барқарорликка йўл очишга ҳаракат қилмоқдамиз”, — деди ал-Далатий.

19 июль куни Сурия муваққат президенти Аҳмад ал-Шаъра идораси асосан дарзийлар истиқомат қилувчи Сувайда вилоятида «зудлик билан ўт очишни тўхтатиш» ҳақида эълон қилди. Бироқ, кузатувчиларга кўра, баъзи жанглар давом этган. 20 июль куни дарзийлар Сувайда шаҳрини тўлиқ назорат остига олган.

• Suriya