Қашқадарёда 750 дона қалбаки алкоголь маҳсулотларини сотмоқчи бўлган шахс ушланди.

Қашқадарё вилоятининг Ғузор туманида қалбаки акциз маркали алкоголь маҳсулотларини савдога чиқаришга уринган шахс қўлга олинди.

Бош прокуратура ҳузуридаги Департаментнинг Ғузор туман бўлими ва Ички ишлар бўлими ходимлари ҳамкорлигида ўтказилган тезкор тадбир давомида фуқаро А.Х. “Дамас” русумли автомашинасида 3 турдаги, жами 750 дона қалбаки акциз маркали спиртли ичимликларни Деҳқонобод туманига олиб келаётган вақтида қўлга олинган.

Ҳуқуқ-тартибот органлари маълумотига кўра, А.Х. ушбу маҳсулотларни ноқонуний равишда савдога чиқаришни режалаштирган. Воқеа жойидан барча маҳсулотлар ашёвий далил сифатида ҳужжатлаштирилган.

Ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш ва уларни муомалага чиқариш) билан жиноят иши қўзғатилди. Ҳозирда тергов ҳаракатлари олиб борилмоқда.

• Aлкогол
• Qashqadaryo