Тошкент шаҳрида Корея Эксимбанки билан ҳамкорликда йирик “тиббиёт кластери” ташкил этилади. Лойиҳа доирасида Корея Республикасининг Иқтисодий ривожланиш ва ҳамкорлик жамғармаси иштирокида катта ёшдагилар учун кўп тармоқли замонавий тиббиёт маркази барпо этилади.

Куни кеча Соғлиқни сақлаш вазири ва бош пудратчи сифатида танланган “Керёнг” консорциуми раҳбари ўртасида лойиҳа бўйича шартнома имзоланди ва қурилиш ишлари расман бошланди.

Лойиҳанинг умумий қиймати 149,8 миллион АҚШ долларини ташкил этади. Шундан 124 миллион доллар — Корея Эксимбанки орқали EDCF кредит маблағлари, 25,8 миллион доллар эса Ўзбекистон улуши ҳисобланади.

Қурилиш якунлангач, 300 ўринли IV даражали шифохона барпо этилади. Унда 700 нафардан ортиқ тиббиёт ходими учун янги иш ўринлари яратилади.

Шунингдек, лойиҳа доирасида 130 нафар ўзбекистонлик тиббиёт ходими малака ошириш учун Кореяга юборилади, 32 нафар кореялик юқори малакали мутахассис эса мамлакатда фаолият юритади.

Янги марказда йилига 8,5 мингга яқин юқори технологик жарроҳлик амалиётлари — юрак-қон томир тизими, нейрохирургия, трансплантация, реабилитация ва бошқа йўналишларда операциялар ўтказиш имконияти яратилади.

• Ҳамкорлик
• Janubiy Koreya
• Ўзбекистон