Тошкентда такси ҳайдовчиси билан юзага келган можаро вақтида унга куч ишлатган блогер қамоққа олинди. Бу ҳақда Тошкент шаҳар Ички ишлар бош бошқармаси Ахборот-мультимедиа маркази бошлиғи ўринбосари Қаҳрамон Худойберганов маълум қилди.

Қайд этилишича, блогер Тошкент шаҳар ИИББ Тергов бошқармаси томонидан қўзғатилган жиноят иши доирасида қамоққа олинган.

Воқеа қандай содир бўлган?

17 август куни Тошкент шаҳрининг Яшнобод туманида такси ҳайдовчиси ва йўловчи аёл ўртасида можаро юзага келган. Можаро вақтида аёлнинг икки нафар таниши бўлган блогер ҳам воқеа жойига етиб келиб, ҳайдовчи билан жанжаллашган.

Дастлабки маълумотларга кўра, блогерлар ҳайдовчини ҳақорат қилиб, унга нисбатан куч ишлатган. Шундан сўнг ҳайдовчи турли тан жароҳатлари билан шифохонага мурожаат қилган.

Тиббий кўрик давомида унинг пешона ва энса қисмларида шишлар, шунингдек, елка, ёнбош, кўкрак ва қорин соҳаларида шилинган жароҳатлар аниқланган.

Воқеадан сўнг блогерлар ҳайдовчини йўловчи аёлга нисбатан жинсий тегажоғлик қилганликда айблаб, можаро акс этган видеоларни ижтимоий тармоқларда тарқатган. Кейинчалик улар видеомурожаат орқали жамоатчиликдан ўзларини оқлашда ёрдам сўраган. Бироқ мазкур видеолар кейинчалик уларнинг саҳифаларидан олиб ташланган.

Ҳозирда ҳолат юзасидан тергов ҳаракатлари олиб борилмоқда.