Украиналик журналист Дмитрий Гордон рус-исроиллик миллиардер Леонид Невзлин билан суҳбатлашди. Суҳбат чоғида Гордон Ўзбекистонни Россияга Эрон дронларини етказиб беришда айблади.

Гордоннинг сўзларига кўра, Эрон дронлари Эрон, Ироқ ва Ўзбекистонда ишлаб чиқарилади. Ишлаб чиқарилгандан сўнг дронлар Россияга жўнатилади.

Гордоннинг сўзларидан сўнг рус-исроиллик миллиардер Леонид Невзлин, Эрон дронларини ишлаб чиқариш аллақачон Эроннинг ўзидан ташқарида кенг тарқалганлигини таъкидлади. Гордон суҳбатдошидан Исроилнинг Эрон учувчисиз учоқлари ишлаб чиқарилган жойларга ҳужум қилиши мумкинлигини сўради.

Невзлин Ўзбекистон ҳақида бирор аниқ нарса айта олмаслигини, уни бетараф ва дўстона давлат деб билиши, юзага келиши мумкин бўлган оқибатлар ҳақидаги огоҳлантириш республикада дронларни ишлаб чиқаришни тўхтатишга ёрдам беришини таъкидлади.

Миллиардернинг сўзларига кўра, “Эрон ва Ироққа келсак, у ерда дрон ишлаб чиқариш майдончаларига ҳужумлар бўлиши мумкин”.

Гордон Эрон дронларининг Ўзбекистонда ишлаб чиқарилиши ҳақидаги маълумотни қаердан олгани ҳозирча номаълум.

Леонид Невзлин ўзи ким?

Леонид Борисович Невзлин 1959 йил 21 сентябрда Москвада туғулган. Рус-исроиллик тадбиркор, ЮКОС нефт компаниясининг собиқ раҳбарларидан бири. 2001 йилда Россия яҳудийлари конгресси президентларидан бири бўлган. 2003 йилда у Россия давлат гуманитар университети ректори бўлиб ишлаган. Ҳозирда Исроилда яшайди. У қотилликларни ташкил этишда айбланиб, Россия суди томонидан сиртдан умрбод қамоқ жазосига ҳукм қилинган. Бу жазо чораси Россия Федерацияси Олий суди томонидан қўллаб-қувватланади. Бундан ташқари, у ВНК акцияларини ўзлаштиргани учун 6 йил қамоқ жазосига ҳукм қилинган. 2005 ва 2008 йилда Россия ҳукумати Исроил ҳукуматидан Невзлинни қотиллик ва қотилликка суиқасд ва бир қатор иқтисодий жиноятларни содир этганликда айблаб экстрадиция қилишни сўраган эди.

• Eron
• Ўзбекистон
• Россия
• Украина
• дрон