Россиянинг Украинага қарши уруши бошланганидан буён мажбуран олиб кетилган 2 368 нафар украиналик бола ўз ватанига қайтарилди. Бу ҳақда Украина Адлия вазирлиги реестри маълумотларига таяниб, болалар ҳуқуқлари ҳимоячиси Катерина Рашевска маълум қилди. Унинг сўзларига кўра, 2026 йил 9 июль ҳолатига Россия томонидан ноқонуний депортация қилинган ёки мажбуран кўчирилган бўлиши мумкин бўлган 20 610 нафар бола рўйхатга олинган. Шулардан 2 368 нафари Украинага қайтарилган. Жорий йилнинг ўзида эса 500 нафардан ортиқ бола ватанига олиб келинган.

Шунингдек, Украина болаларнинг ноқонуний депортациясига алоқадор шахсларни жавобгарликка тортиш ишларини давом эттирмоқда. Ҳозиргача 25 нафар шахсга нисбатан гумон эълон қилинган. Болаларни мафкуравий таъсир остига олиш бўйича 581 та, уларни ҳарбийлаштириш бўйича эса 28 та жиноят иши қўзғатилган. Маълумот учун, 18 июнь ҳолатига кўра Украинага қайтарилган болалар сони 2 274 нафарни ташкил этган бўлса, ҳозирги кўрсаткич 2 368 нафарга етган.