АҚШ Халқаро тараққиёт агентлиги (USAID) Ўзбекистондаги қишлоқ аёлларини қўллаб-қувватлаш учун 2,4 млн доллар ажратади.

Бу ҳақда Ўзбекистон Қишлоқ хўжалиги вазирлигида бўлиб ўтган вазирлик вакилларининг USAIDнинг Осиё бюроси маъмурияти ёрдамчиси ўринбосари Анжали Каур билан бўлиб ўтган учрашувида маълум қилинди.

Учрашув чоғида томонлар USAID ва вазирлик ўртасида “Агробизнесни ривожлантириш” қўшма лойиҳаси доирасида боғдорчилик, қўшилган қийматли маҳсулотларни ишлаб чиқариш, аёлларнинг иқтисодий ҳуқуқ ва имкониятларини кенгайтириш каби йўналишларда ҳамкорликни янада мустаҳкамлаш масалаларини ҳам муҳокама қилишди.

“USAIDнинг Ўзбекистон ҳукумати ва хусусий сектори билан ҳамкорликда олиб борадиган ишининг асосий элементи аёлларнинг иқтисодий имкониятларини кенгайтиришга қаратилган саъй-ҳаракатлардир. Гендер тенглик ва аёллар ҳуқуқ ва имкониятларини кенгайтириш бизнинг тараққиёт борасидаги ишимизнинг марказида туради. АҚШ Ўзбекистондаги аёлларга боғдорчилик соҳасида ўз ишини бошлаш ва ривожлантириш, янги корхоналар очиш ва мавжудларини кенгайтиришга ёрдам берди. Бугун мен USAID жорий йил ёзида Ўзбекистондаги қишлоқ аёллари иқтисодий имкониятларини кенгайтириши учун қўшимча равишда 2,4 миллион доллар ажратишини эълон қилишдан жуда мамнунман”, – дейди Анжали Каур.

Тадбирда таъкидланганидек, ушбу маблағлар Ўзбекистон, айниқса, Оролбўйи ҳудудидаги қишлоқ аёлларини қўллаб-қувватлаш, уларга тадбиркорлик кўникмаларини ўргатиш, касб-ҳунар бериш, микромолиялаштириш, мураббийлик ва бандлик дастурларини амалга ошириш учун йўналтирилади.

• Аёллар
• Ўзбекистон
• USAID