Ҳиндистоннинг Чхаттисгарх штатида 4 ёшли боланинг жасади маккажўхори даласи яқинидаги сув тўпланган чуқурликдан топилди. Уни ўлдиришда гумонланиб, 27 ёшли қариндоши қўлга олинди. Полиция маълумотига кўра, гумонланувчи боланинг органларини сотиш орқали пул топишни режалаштирган. Бу ҳақда “Haberler” хабар берди.

Қайд этилишича, ҳодиса Жашпур ҳудудида содир бўлган. 4 ёшли Житендра Рам 5 ноябрь куни эрталаб бедарак йўқолган. Оила аъзолари уни мустақил равишда қидирган, бироқ натижа бўлмагач, полицияга мурожаат қилган.

Боланинг отаси Рамжит Ram’нинг айтишича, у оиласи билан тахминан бир йил аввал ишлаш мақсадида Санна қишлоғига кўчиб келган. Унинг она томондан қариндоши Басудев ҳам оиланинг уйига тез-тез келиб турган. Гувоҳлардан бири Житендрани йўқолган куни Басудев билан бирга даладаги кулба томон кетаётганида кўрганини билдирган.

Икки кун давом этган қидирув ишлари 7 ноябрь куни якунланган. Боланинг жасади маккажўхори даласи яқинидаги сув тўпланган чуқурликдан топилган. У кўрпа-тўшакларга ўралиб, қопга солинган, жасаднинг усти эса қисман тупроқ билан ёпилган бўлган.

Полиция маълумотига кўра, қишлоқ хўжалиги ишчиси бўлиб ишлаган Басудев даромадидан норози бўлган ва интернет орқали кўпроқ пул топиш йўлларини излаган. Тергов маълумотларида у болани алдаб, оиласидан узоқлаштиргани ва кейинчалик ўлдиргани қайд этилган.

Гумонланувчи сўроқ пайтида боланинг бир буйраги, бир ўпкаси ва бир кўзини олиб ташлаганини тан олган. Бироқ полиция органларни сотиш режаси ҳозирча фақат унинг кўрсатмаларига асосланганини маълум қилган. Органларни сотиб олиши мумкин бўлган шахслар билан алоқа ўрнатилгани ёки савдо амалга оширилганини тасдиқловчи далиллар аниқланмаган.

Айни пайтда ҳодиса юзасидан тергов ҳаракатлари давом этмоқда.