Келгуси йилдан Ўзбекистонда “1 минг муҳандис-конструктор” дастурини амалга ошириш бошланади. Дастур доирасида маҳаллий мутахассислар малакасини ошириш учун Жанубий Корея, Япония, Хитой, Туркия ва Европа мамлакатларига юборилади.

Шунингдек, нуфузли хорижий компанияларда фаолият юритаётган юқори малакали ватандош мутахассисларни мамлакатга жалб қилиш режалаштирилган. Бунинг учун уларга муносиб иш ҳақи ва меҳнат шароитлари яратилади.

Бундан ташқари, “Янги Ўзбекистон”, Инҳа, “ToshTech” ва Турин политехника университетларига етакчи хорижий олий таълим муассасалари билан қўшма таълим дастурларини ташкил этиш, хорижий мутахассисларни жалб қилиш ҳамда замонавий муҳандис-технологлар тайёрлаш кўламини кенгайтириш топширилди.

Мазкур дастур орқали мамлакат саноатининг технологик ривожланишига ҳисса қўшадиган юқори малакали муҳандислар корпусини шакллантириш кўзда тутилган.