Уй вазифалари мактаб ўқувчилари учун доимий муаммо бўлиб келган. Ўқув машғулотларидан чарчаб келган болалар уйда яна дарс столига ўтиришга мажбур бўлишади. Баъзилар эса туни билан топшириқлар устида ишлайди. Хўш, уй ишларини бажариш учун бола қанча вақт сарфлаши керак? Қандай қилиб фарзандингизга уларни тез ва самарали бажаришда ёрдам беришингиз мумкин?

Бу бўйича таълим ва психология соҳаси мутахассисларидан бир қанча тавсияларни улашамиз.

Мухатахассисларнинг фикрига кўра, 2-3-синф ўқувчилари уй вазифаларига 1,5 соат, 4-5-синфлар 2 соат, 6-8-синфлар 2,5 соат, 9-11-синф ўқувчилари 3 соат вақт ажратишлари мумкин.

Педагогика фанлари номзоди Светлана Гускова 1-синфда уй вазифаси умуман бўлмаслиги керак деб ҳисоблайди.

"Мактаб ҳаётига мослашиш маълум вақтни олади, шунинг учун мажбурий уй вазифаси бўлмаслиги керак, чунки у болани қийнаб қўяди ва ўрганиш учун мотивациясини камайтиради", дейди у.

Деярли барча ота-оналар фарзандларининг уй ишларида уларга ёрдам беради. Лекин катталар бу борада кўпинча хатога йўл қўйишади. Яъни ўз боласини синфдаги бошқа болалар билан таққослаш ва ўқишга мотивация бермаслик орқали.

Шунингдек, мутахассис огоҳлантиради: болани овқатдан кейин дарҳол дарс қилишга мажбурламаслик керак. Чунки организм овқатни ҳазм қилиш вақтида интеллектуал қобилиятлар бироз пасаяди.

Агар бола уй вазифасини ўзига қулай вақтда бажарса, у кўпроқ кучга эга бўлади, топшириқлар тезроқ ва осонроқ бажарилади.

Кўпинча ота-оналар дарсларни мактабдан сўнг дарҳол бошлаш яхшироқ деган фикрда. Аммо болаларда бу тамойил ишламайди.

Бола кун бўйи мактабдаги шовқинли муҳитда, кўп одамлар орасида бўлади, асабийлашади ёки ўзини ёмон ҳис қилади. Шунинг учун ўқувчининг яқинлари унга дарс учун тинч ва қулай муҳит яратиб бериши мақсадга мувофиқдир.

“Бола синфдагидан кўра уйда кўпроқ нарсага эриша олади. Бола уй вазифасини бажарадиган жойда уй тинч, осойишта ва тоза бўлишига ишонч ҳосил қилинг”, — дейди педагоглардан бири.

Бола яхши ўқиши учун 5 та муҳим тавсия:

1) Фарзандингизни чалғитадиган барча нарсаларни, шу жумладан, гаджетларни олиб қўйинг.

2) 25 дақиқа ўқиб, 5 дақиқа дам олишни ўргатинг.

3) Энг муҳим вазифаларни биринчи бажариш кераклигини уқтиринг.

4) Катта вазифаларни қисмларга бўлиб, уларни ҳафтанинг куни бўйича тақсимлаш кераклигини айтинг.

5) Ёрдам сўраш кераклигини тушунтиринг.

• Мактаб
• Oila