Канадалик олимлар кўршапалаклар устида тадқиқот ўтказишди ва “вампир кўршапалаклар” ўз ўлжасининг қони ёрдамида энергия ҳосил қилиши аниқланди. Бу ҳайвоннинг метаболизми бошқа кўплаб сутемизувчиларникидан фарқ қилиши аниқланди.

Тадқиқот натижалари Biology Letters журналида чоп этилди.

Тадқиқот учун Канададаги Макмастер университети ва Торонто университети биологлари Белизда 24 та “вампир кўршапалак” тутишди ва уларга қорамол қони берилди. Уларни ҳаракатлантириш учун махсус югуриш йўлагига қўйишди. Ҳаракатдаги кўршапалакларнинг нафас чиқаргандаги ҳавосидан намуна олиб, таркибини ўрганишди.

Олимлар кислород ва карбонат ангидрид нисбатлари кўршапалак ҳаракати тезлигидан қатъи назар ўзгармаганини, бироқ уларнинг нафас чиқараётган ҳавосида аминокислоталар излари борлиги аниқлашди. Бу олимларга бошқа сутемизувчиларникидан фарқли ўлароқ, кўршапалакларнинг асосий энергия манбаи сифатида қон ишлатилаётганини тахмин қилишга сабаб бўлди.

Тадқиқотчиларнинг сўзларига кўра, бу метаболизм ўзига хос парҳез таъсири остида қанчалик ўзгариши мумкинлигини кўрсатади, яъни “вампир кўршапалаклар” ўз озиқ-овқатларидан жуда кам миқдорда углевод ва ёғ олади. Бундан ташқари, ичилган қон уларнинг тана ўлчамини деярли икки баробар оширишга имкон беради.

• Birinchi jahon urushi
• Канада
• Olimlar
• Янгилик
• тадқиқот