Жорий йилнинг 18 апрель куни Ўзбекистон Республикаси инвестициялар, саноат ва савдо вазири Лазиз Кудратов Нара шаҳри мери Ген Накагава бошчилигидаги Япония делегацияси билан учрашув ўтказди.

Делегация орасида Forest Home, Morinaraduketen, Clam Group, Nara Kotsu Bus Lines, Withonoware, Rire Stage, Seiwa Giken, Sakurug, Seiyo Kosan, Reiwa Switch ва бошқа Япониянинг етакчи компаниялари вакиллари бор эди.

Учрашув давомида томонлар икки томонлама ҳамкорликни янада мустаҳкамлаш истиқболларини муҳокама қилдилар. Асосий эътибор соғлиқни сақлаш, ахборот-коммуникация технологиялари, меҳмонхона бизнеси каби соҳалардаги ҳамкорликни ривожлантиришга, шунингдек, Ўзбекистон озиқ-овқат маҳсулотлари экспортини Япония бозорига кенгайтириш масалаларига қаратилди.

Япония томони 17 апрель куни Самарқандда бўлиб ўтган қўшма бизнес-форумни ташкил этишни юқори баҳолаб, унинг Нара ва Самарқанд шаҳарлари ўртасидаги ишбилармонлик алоқаларини мустаҳкамлашдаги аҳамиятини таъкидлади.

Учрашув якунида Япония делегацияси вакиллари ўзаро манфаатли ҳамкорликни ривожлантиришни давом эттириш ва устувор йўналишларда қўшма лойиҳаларни амалга оширишга тайёрлигини тасдиқладилар.

• Ҳамкорлик
• Ўзбекистон
• Япония