Японияда ноқонуний яшаб келган икки нафар Ўзбекистон фуқароси мамлакатдан чиқариб юборилди. Бу ҳақда Ўзбекистоннинг Япониядаги элчихонаси маълум қилди.

Маълум қилинишича, улардан бири Японияга талаба визаси билан кирган, бироқ ўқишдан четлатилгач ҳам мамлакатни тарк этмаган ва ноқонуний яшаб келгани учун қўлга олинган. Иккинчи фуқаро эса қисқа муддатли виза билан кириб, рухсат этилган муддат тугаганига қарамай чиқиб кетмаган.

Япония томони эслатишича, қисқа муддатли визалар билан ишлаш қатъиян тақиқланган. Талаба визаси эса фақат таълим олиш учун берилади ва ўқиш тўхтатилса, яшаш мақоми ҳам бекор қилинади.

“Туризм” ёки “талаба” визаси орқали Японияда узоқ муддат қолиш ёки ишлаш мумкинлиги ҳақидаги гаплар ҳақиқатга тўғри келмайди. Ноқонуний яшаётган шахслар аниқланса, улар ҳибсга олинади ва депортация қилинади.

Шунингдек, бундай ҳолатлар бўйича маълумотлар Ўзбекистон томонига ҳам етказилиши, натижада фуқаро ватанга қайтгач ҳам тегишли чоралар кўрилиши мумкинлиги таъкидланган.